भांगरभूंय | प्रतिनिधी
हरमल बेकायदो बांदकाम प्रकरण
पणजी : गिरकरवाडो, हरमलाच्या सीआरझॅड वाठारांत चार माळ्याचे इमारतीचें बेकायदो बांदकाम करपी धनयान 13 डिसेंबर 2023 आदीं तें मोडटलों, अशी हमी मुंबय उच्च न्यायालयाच्या गोंय खंडपिठांत दिल्ली. पूण मुजत सोंपचे पयलींच तो सर्वोच्च न्यायालयांत गेलाे. रवी हरमलकर हांचे सयत राजेश दाबोळकार हांणी बेकायदो बांदकामा विशीं उच्च न्यायालयांत याचिका दाखल केल्या. हातूंत राज्य सरकार, हरमल पंचायत सचीव, इमारत धनी अशोक कंधारी आनी पंचायत संचालक हांकां प्रतिवादी केल्यात.गिरकरवाडो हरमल हांगासरल्या विकास प्रतिबंधीत क्षेत्रांत अशोक कंधारीन सर्वे क्र. 63/92 त चार माळ्याच्या इमारतीचें बेकायदो बांदकाम केलां. ह्या इमारतींतल्यान हॉटेल वेवसायूय चलतालो. विशेश म्हणल्यार ते खातीर खंयचेच सरकारी यंत्रणे कडल्यान परवानगी घेवंक नाशिल्ली, अशे मुद्दे याचिकेंत मांडिल्ले.
खंडपिठान याचिकेची दखल घेतली तेन्ना, वयल्या मुद्यांत तथ्य आशिल्ल्याचें मुखार आयलें. ते प्रमाण खंडपिठान आदेश जारी करून संबंदीत इमारत सील करपाचो आदेश जारी केल्लो. उपरांत अशोक कंधारीन खंडपिठांत हमी दिवन स सप्तकांत बांदकाम मातयेभरवण करतलों अशें वचन दिल्लें. ते खातीर इमारतीक लायिल्लें कुलप काडचें अशी विनंती ताणें खंडपिठा कडेन केल्ली.
हे विशीं खंडपिठान कंधारीक इमारत मातयेभरवण करपा खातीर 13 डिसेंबर मेरेन मुजत दिल्ली. तशेंच इमारत पाडिल्ल्याचो कृती अहवाल दाखल करचो अशें खंडपिठान सांगिल्लें. हें बांदकाम पाडपाचें कांय दीस आसतनाच कंधारीन आपलें बांदकाम वाटावपा खातीर सर्वोच्च न्यायालयांत धांव घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
