भांगरभूंय | प्रतिनिधी
अध्यक्ष श्यामसुंदर गंवस हांचो दावो; ‘भांगरभूंय’चे खबरेन सरपंचाचेर टिका
पेडणें: इब्रामपूर पंचायत वाठारांतल्याे 90 टक्के कोमुनिदादीच्यो जमनी कूळ संबंदींत नागरिकां कडेन आसात. समितीन आयज मेरेन खंयच्याय विकासकामांक वा घरां बांदप्यांक आडयिल्लें ना. सरपंच अशोक धावस्कार आनी हेरां कडल्यान समितीचेर जायत आशिल्ले आरोप फटीचे आसात असो दावो कोमुनिदाद समितीन काल (शुक्रारा) इब्रामपूर हांगा घेतिल्ले पत्रकार परिशदेंत केलाे.
समितीचे अध्यक्ष श्यामसुंदर गंवस, भांडारी आत्माराम गंवस आनी हेर नागरीक ह्या वेळार हाजीर आशिल्ले. ‘भांगरभूंय’चे प्रतिनिधीन इब्रामपूरची खासा भोंवडी करून 24 ऑगस्ट दिसा ‘दत्तक इब्रामपूरचें उदरगतींत कोमुनिदादीची आडखळ’ ह्या माथाळ्या खाला बातमी उजवाडायिल्ली. तातूंत केंद्राच्या सांसद आदर्श ग्राम येवजणे खाला केंद्रीय मंत्री तशेंच उत्तर गोंयचे खासदार श्रीपाद नायक हांणी दत्तक घेतिल्ल्या इब्रामपूरांतली कोमुनिदाद जमीन प्रस्न उक्ताडार हाडिल्लो.
‘भांगरभूंय’चे प्रतिनिधी कडेन उलयतना सरपंच अशोक धावस्कार हांणी इब्रामपूर कोमुनिदाद समितीक हरकत ना दाखले (एनओसी) दिनाशिल्ल्यान खूबशे विकास प्रकल्प रखडिल्ल्याचो आरोप केल्लो. हे खबरेची दखल घेवन शुक्रारा कोमुनिदाद समितीन पत्रकार परिशद घेवन सरपंच धावस्कार आनी थळावे नागरीक गंगाधर गंवस हांकां आरोपीच्या पांदर्यांत उबे केले.
अशोक धावस्कार स्वता कूळ आनी सरपंच आसतनाच कोमुनिदादींतले 38 हजार चौखण मिटर जमनींत बेकायदो मोबायल टॉवर उबारला. ताचे भाडेंय धावस्कार घेतात. तशेंच तांणी कोमुनिदाद जमनींत बेकायदो रितीन डेरी आनी घरूय बांदलां. डेरीचें भाडें लेगीत स्वता धावस्कारूच घेतात. समितीच्या एकाय वांगड्या कडेन कोमुनिदादीची सुवात ना. वा एकाय वांगड्यान अतिक्रमण करून कोमुनिदाद जमीन ताब्यांत घेतिल्ली ना असो दावो अध्यक्ष श्यामसुंदर गंवस हांणी केलो.
इब्रामपूर कोमुनिदाद समितीन आयज मेरेन गांवांतल्या खंयच्याच विकास प्रकल्पांक आडमेळीं हाडिल्ली ना. गांवच्या हिता खातीर सांतेरी मंदीर हायस्कूल, मैदान, भौशीक मसंडभूंय, चर्च सोबितीकरण तशेंच हेर प्रकल्पां खातीर समितीन एनओसी दिल्या. तरी लेगीत सरपंच अशोक धावस्कार कोमुनिदाद समिती प्रकल्पांक जमीन दिनाशिल्ल्याचो जो आरोप करतात तो पुरायपणान चुकीचो आसा अशें तांणी म्हणलें.
इब्रामपूरांत उदकाची टांकी, वीज, उदक, रस्ते, बँक, एटीएम, पोस्ट ऑफीस, भलायकी केंद्र, मैदान अश्यो सुविधा आसून लेगीत सरपंच गरजे भायर समितीचेर आरोप कित्याक करतात असो प्रस्नूय तांणी उपस्थीत केलो.
नाजाल्यार मुखा वेलीं पावलां उबारूं
सरपंच धावस्कार हांणी कोमुनिदाद समिती वयले आरोप थांबोवचे. नाजाल्यार समितीक योग्य ती पावलां उबारचीं पडटलीं अशी शिटकावणी श्यामसुंदर गंवस आनी गौरीश गंवस हांणी दिल्या. धावस्कार हांच्या कुटुंबा कडेन वट्ट 38 हजार चौखण मिटर जमीन आसा. ती तांची कूळ म्हणून आसली तरी तांचे कडेन त्या जमनीचो मालकी हक्क कसो वता असो प्रस्न गौरेश गंवस हांणी उपस्थीत केलो.
सरपंच अशोक धावस्कार म्हणटात…
– आपणे जीं बांदकामां केल्यांत ती कायदेशीरपणान केल्यांत. कोमुनिदादीचे जमनींत कसलेच तरेची बेकायदो बांदकामां आपणें केल्लीं नात.
– इब्रामपूर कोमुनिदाद समिती कडल्यान आपल्याचेर जायत आशिल्ले आरोपूय दिशाहीन आसात. आपले वयले आरोप आनी कोमुनिदाद जमनी विशीं आपूण समिती कडेन उक्तेपणान चर्चा करपाक तयार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
