भांगरभूंय | प्रतिनिधी
खबरां संस्था
नॉटिंगहॅमः तिसरे टी-20 मॅचींत भारताक 17 धांवड्यांनी हारोवन येजमान इंग्लंडान व्हाटय वॉश वाटायलो. भारताक जैताच्या दारांत हाडून सोडपी सूर्यकुमार यादवाची खेळी (117) निर्फळ थारली जाल्यार डेव्हीड मलान (77) रिस टोप्ले आनी डेव्हीड विली ह्या बॉलरांनी इंग्लंडाक हे निर्णाय मॅचींत जैत मेळोवन दिवन पंगडाची लज राखली. इंग्लंडाक ताचे मायभुंयेत सगल्यात चड फावट हारोवपाची भारताक संद आशिल्ली. सूर्यकुमार खेळटना हें शक्य आसा अशें दिसतालें. मात तो आवट जाल्या उपरांत भारताचो डाव कोसळ्ळो आनी तांका जैताचे सुवातेर हार खावची पडली.
जैता खातीर भारताक 20 ओव्हरींत 216 धांवड्यो करपाच्यो आशिल्ल्यो. मात 20वे ओव्हरींत तांचो डाव 198 धांवड्यांत सोपलो. तीन मॅचींची ही माळ भारतान 2-1 अशी जिखल्या. हे मॅचींत तांका इंग्लंडाक व्हायट वॉश दिवपाची संद आशिल्ली. सूर्यकुमार आनी श्रेयस अय्यरान 3 बाद 31 उपरांत भारताक 4 बाद 150 अशे बरे स्थितींत हाडून दवोरिल्लें. मात यादव आवट जाल्या उपरांत दिनेश कार्तिक (8), रवींद्र जडेजा (7), हर्शल पटले (5) आनी रवी बिष्णोय एकाफाटल्यान एक आवट जाले आनी तोंडा मेरेन आयिल्ली जैताची उणी भारताक गिळपाक मेळ्ळी ना. टोप्लेन 3 आनी डेव्हीड विलीन 2 विकेटी घेवन भारताक हारोवपाक योगदान दिलें.
इंग्लंडाक तिसरे टी-20 हारोवन हे माळेंत क्लीन स्वीप करपा खातीर 216 धांवड्यांचे लक्ष्य घेवन मैदानात देंवल्ल्या भारताची स्थिती रीस टोप्ले आनी डेव्हीड विली हांणी 3 बाद 31 अशी करून इंग्लंडाच्या डावाची पुनरावृत्ती केली. मात तांणी पयले 3 गडी 84 धांवड्यांत वोगडायल्ले. टोप्लेन ऋषभ पंत (1) आनी रोहीम शर्मा (11) ह्या ओनपरांक आवट केलें. विराट कोहली परत एक फावट अपेशी थारलो. ताणे 6 बॉलांत एक सको आनी एका चौक्यान 11 धांवड्यो केल्यो. विलीच्या बॉलार रॉयान ताची कॅच घेतली. पयलेच ओव्हरीत टोप्लेन ऋषभ पंताक विकेटीकीपर बटलरा वरवीं कॅच आवट केलें. विलीन विराटाक आवट केल्या उपरांत टोप्लेन रोहिताक आवट करून भारताक व्हडलो धपको दिलो. रोहिताची कॅच सॉल्टान धरली. 3 बाद 31 उपरांत सूर्यकुमार यादव आनी श्रेयस अय्यर हांणी भारताक साल्वार करून जैताचे वाटेर हाडून सोडलें. तांणी 4थे विकेटी खातीर 119 धांवड्याची भागिदारी करून भारताच्यो 150 धांवड्यो बोर्डार लायल्यो. सूर्यकुमाराच्या आक्रमणाक श्रेयसान संयमी साथ दिवन 23 बॉलांत 2 सक्यांनी 28 धांवड्यो केल्यो. टोप्लेन ही जोडी फोडली.
उपरांत दिनेश कार्तिकाक वांगडा घेवन सूर्यकुमारान आपलो शेंकडो पुराय केलो. तातूंत 12 चौके आनी 5 सक्यांचो आसपाव आशिल्लो. कार्तिकाक डेव्हीड विलीन (6) आवट केलो. ह्या वेळार भारत जैत आनी हार हाचे मदीं आशिल्लो. 17 वी ओव्हर सुरू जाली तेन्ना भारताक जैता खातीर 50 धांवड्यांची गरज आशिल्ली. आनी जैत हास्तासपाचें काम सूर्यकुमार आनी रवींद्र जडेजाचेर येवन पडिल्लें. मात रिचर्ड ग्लिसनान जडेजाक (7) बाद करून भारताक हारीचे वाटेर हाडलें.
मलान- लियानान साल्वार केलें.
सुरवातीच्या धपक्यां उपरांत डेव्हीड मलान आनी लियान लिव्हिंगस्टोनान चवथे विकेटी खातीर 84 धांवड्याची भागिदारी करून इंग्लंडाक साल्वार केल्ल्यान तांणी 20 ओव्हरींत 7 बाद 215 धांवड्यो करून भारताक जैता खातीर 216 धांवड्यो करपाचें लक्ष्य दिलें. मलानान 39 बॉलांत 6 चौके आनी 5 सक्यांनी दणदणीत 77 धांवड्यो केल्यो जाल्यार लिव्हिंगस्टोनान 4 सक्यांनी नाबाद 42 धांवड्यो केल्यो
ट्रेंट ब्रिज स्टेडियमा वयले निर्णायक अशें तिसरे टी-20 मॅचीचे सुरवेकूत भारताचे फास्ट बॉलर आवेश खान आनी उमरान मलीक हांणी इंग्लंडाक दोन धपके दिले. तांच्यो 31 धांवड्यो जाल्ल्यो तेन्ना कॅप्शन जोस बटलराक आवेश खानाक क्लीन बोल्ड केलें. ताणे 9 बॉलांत 2 चौके आनी एक सक्यान 18 धांवड्यो केल्यो. उपरांत उमरानान दुसरो ओपनर जोसन रॉयाक विकेटकीपर ऋषभ पंताच्या हातांत कॅच दिवपाक लावन इंग्लंडाची स्थिती 2 बाद 61 अशी केली. हर्शल पटेलान इंग्लंडाक तिसरो धपको दितना फिलीप सॉल्टाक (8) आवट करून इंग्लंडाची स्थिती 9 ओव्हरींत 3 बाद 84 अशी केली.
डेव्हीड मलानान 5 चौके आनी 2 सक्यांनी आपलो अर्द शेंकडो पुराय करून पंगडाचोय शेंकडो पुराय केलो. सुरवातीच्या धपक्या उपरांत मलानान लियान लिव्हिंगस्टोनाक वांगडा घेवंन पंगडाच्यो 125 धांवड्यो 13वे ओव्हरींत बोर्डार लायल्यो. ही जोडी फोडपा खातीर कॅप्टन रोहीत शर्मा स्पिनर रवी बिष्णोय आनी रवींद्र जडेजाचे हाडले. मात ते बरेच म्हारग पडले. मलान, लिव्हिंगस्टोनान जडेजाचे 4 ओव्हरींत 43 आनी बिष्णोयाचे 3 ओव्हरीत 29 धांवड्यो काडल्यो. 15वे ओव्हरींत तांणी इंग्लंडाचो देड शेंकडो पुराय केलो. मलान शेंकडो करतलो अशें दिसतालें तेन्नाच बिष्णोयान ताका ऋिषभ पंता वरवीं कॅच आवट केलें. ताणे 39 बॉलांत 6 चौके आनी 5 सक्यांनी 77 धांवड्यो करून चवथे विकेटी खातीर लिव्हिंगस्टोना वांगडा 84 धांवड्यांची भागिदारी केली. विष्णोयान मोईल अलीक (0) पेव्हेलियनांत धाडतकूच हर्षल पटेलान हेरी ब्रुकान (19) आवट करून इंग्लंडाची स्थिती 6 बाद 197 अशी केली. लिव्हिंगस्टोनान ख्रिस जॉर्डनाक वांगडा घेवन पंगडाच्यो 200 धांवड्यो पुराय केल्यो. लिव्हिंगस्टोनान 29 बॉलांत 4 सक्यांनी नाबाद 42 धांवड्यो केल्यो 20वे ओव्हरींत जॉर्डन 11 धांवड्यांचेर रनआवट जालो आनी इंग्लंडाचो डाव 7 बाद 215 धांवड्यांत सोपलो. बिष्णोय आनी हर्शलान दरेकी दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
