भांगरभूंय | प्रतिनिधी
-मुख्यमंत्री डॉ. सावंत तेलंगण राज्याचे भोंवडेर
पणजी : मुख्यमंत्री डॉ. प्रमोद सावंत मंगळारा तेलंगण राज्याचे भोंवडेर गेल्ल्यान नवनिर्वाचीत मंत्री आलेक्स सिक्वेरा हांकां खातीं दिवपा विशींचो निर्णय फुडें धुकल्ला. मुख्यमंत्री 24 नोव्हेंबराक गोंयांत येतले. ते उपरांतूच सिक्वेरा हांकां खात्याचे वांटप करतले.
आलेक्स सिक्वेरा हांणी मंत्री म्हूण सोपूत घेवन दोन दीस जाले. मंगळारा मुख्यमंत्री तेलंगण राज्याचे भोंवडेर गेल्ल्यान मंगळारा सांजे मेरेन तांकां खात्याचे वांटप जातले, अशें सगल्यांकूच दिसताले. पूण मुख्यमंत्री तेलंगण राज्याचे भोंवडेर गेल्ल्यान हो निर्णय फुडें धुकलिल्ल्याचे आनी 24 वेर मुख्यमंत्री गोंयांत आयले उपरांतूच आलेक्स सिक्वेरांक खात्याचे वांटप जातले, हे निश्चीत जाला.
मजगतीं, निलेश काब्राल हांकां मंत्रीमंडळांतल्यान वगळायले उपरांत तांचे सुवातेर काँग्रेसींतल्यान आयिल्ले आलेक्स सिक्वेरा हांकां आयतारा मंत्रीपदाचो सोपूत दिलो. मंत्री म्हूण आसपी हेर सुविधा सिक्वेरांक दिल्यात. पूण अजून तांकां खात्याचे वांटप करूंक ना. तांकां खातीं दितना हेर मंत्र्यांच्या खात्यांतूय बदल जावपाची शक्यताय आसा. काब्राल हांचे कडेन म्हत्वाचे पिडब्ल्यूडी खातें आशिल्ले. त्या खात्याचेर सध्या दोन मंत्र्यांची नदर आशिल्ल्याचेय स्पश्ट जाला.
मुख्यमंत्री डॉ. प्रमोद सावंत आपणाक जी खातीं दितले, ताचेर आपूण समाधानी आसतलो, अशी प्रतिक्रिया नवे मंत्री आलेक्स सिक्वेरा हांणी आमच्या प्रतिनिधी कडेन उलयतना दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
