भांगरभूंय | प्रतिनिधी
आयपीएलचो 15वो हंगाम नेटान चालू आसतना मॅच फिक्सिंग आनी सट्टेबाजीच्या आरोपांत सीबीआयन तीन दुबावितांक अटक केल्या. तातूंतले दोग आरोपी हैदराबादचे जाल्यार एक दिल्लीचो अशें कळटा. तशेंच आरोपींक पाकिस्ताना कडल्यान सुचोवण्यो मेळटात असोय दुबाव सीबीआयक आसा. सीबीआयन शेनवारा (14 मे) ही कारवाय केल्या आनी देशभर चवकशी सुरू आसा. मेळिल्ले म्हायती प्रमाण हो प्रकार आयपीएलाच्या 2019 हंगामा कडेन संबंदीत आसा.
गुर्राम सतिश आनी गुर्राम वसू (हैदराबाद) आनी दिलीप कुमार (दिल्ली) अशी ताब्यांत घेतिल्ल्या आरोपींची नांवां आसात.
एफआरआयंत नोंद केल्ल्या प्रमाण आयपीएल मॅचींचेर प्रभाव घालपा खातीर तशेंच सट्टो लावपाक आरोपींक पाकिस्ताना कडल्यान इनपुट मेळटाले अशी म्हायती सीबीआयक मेळिल्ली.
2013 वर्सा सावन हें नेटवर्क चलता आनी आरोपींचेर जायत्या नागरिकांक जुगार खेळपाक प्रवृत्त केल्ल्याचो दुबाव आसा अशें सीबीआयच्या अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
