भांगरभूंय | प्रतिनिधी
दुसरे वन डे मॅचींत लजेक घालपी हारीचो धपको बसल्या उपरांत भारताचो पंगड आयज मॅचॅस्टरांत इंग्लंडा आडचे तिसरे आनी निमाणे वन डे मॅचींत आपले बॅटिंगेंत मात्सो बदल करपाची आस्त आसा. भारत चड सादूर रावचे बदला धिटायेन बॅटींग करपाचो यत्न करतलो.
रोहीत शर्माच्या फुडारपणाखाला खेळपी पंगडान हालींच सोंपिल्ले टी-20 माळेंत चड आक्रमक बॅटींग केल्ली. हे रणनितींतल्यान ताका चड येस लेगीत फावो जाल्लें. पूण, दुसरे वन डे मॅचींत 247 धांवड्यांचो फाटलाव करतना भारतान चडूच सादरताय बाळगिल्ली.
रीस टोपली आनी डॅव्हीड विली हांचो बॉल बरोच स्वींग जातालो. ताका लागून आपणेन आनी शिखर धवन हाणें रक्षात्मक भुमिका घेतली अशें मॅच सोंपल्या उपरांत पत्रकारां कडेन उलयतना रोहीत शर्मान मान्य केल्लें.
विराट कोहलीचो बाबत फॉर्म चालूच आसा. ताचो फटको दुसरे मॅचींत लेगीत बसकलो. पूण, सुरवातीच्यो दोन मॅडन ओव्हरी खेळपी रोहीत आनी शिधर हांणी सकारात्मक मानसीकतया दाखोवंक ना.
भारता भशेन इंग्लंडाच्या बॅट्समनांनी लेगीत धांवड्यो करतना संघर्श केलो. दोनूय मॅचींनी जोस बटलर, जॉनी बॅयरस्टो, जेसन रॉय, बेन स्टोक्स आनी लियाम लिव्हिंगस्टोन हे प्रतिभावंत खेळगडे आदली क्रिकेट खेळटात काय कितें अशें दिसपाक लागिल्लें.
ओल्ड ट्रॅफर्डाची खेळपट्टी सुरवातीक बॉलरांक मजत करता. 2019तली सेमी फायनल ह्याच मैदानाचेर जाल्ले आनी त्या वेळार ताका हार घेवची पडिल्ली.
बॉलींग विभागान आतां मेरेन बरें प्रदर्शन केलां. पयले मॅचींत ताणें जबरदस्त प्रदर्शन केल्लें, जाल्यार दुसरे मॅचींत लेगीत प्रतिस्पर्धी बॅट्समनांक व्हड खेळी करपा पसून आडायिल्ले.
फास्ट बॉलर जसप्रीत बुमरान पयले मॅचींत स विकेटी घेतिल्ल्यो, जाल्यार दुसरे मॅचींत लेगीत ताणें बरी बॉलींग घाल्ली. ताका फास्ट बॉलर मोहम्मद शमीन बरी साथ दिल्या. स्पिनर युजवेंद्र चहलान आपले बॉलींग टॅक्निकांत मात्सो बदल केला आनी ताचो ताका फायदो लेगीत जावपाक लागला. हार्दिक पांड्या आनी प्रसिद्ध कृष्णा लेगीत फॉर्मांत आसा. फक्त हुस्को म्हणल्यार रवींद्र जडेजाची बॉलींग. ताचें बॉलिंगेंतलें प्रदर्शन सातत्यान देंवत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
