आयच्यान वास्को श्री दामोदर सप्ताक सुरवात

भांगरभूंय | प्रतिनिधी

भांगरभूंय I प्रतिनिधी
वास्कोः गोंयच्या नामनेच्या श्री दामोदर सप्ताक आयच्यान सुरवात जातली. हे फाटभुंयेर उत्सव समिती आनी थळाव्या प्रशासनान सगलीं तयारी केल्या. भाविकांची कसलीच गैरवेवस्था जावची न्हय, हे खातीर जतनाय घेतले. तेच प्रमाण दरेकल्यान कोवीड मार्गदर्शक तत्वांक पाळो दिवन देवदर्शन घेवचें हे खातीर थळावे प्रशासन सज्ज आसा.
श्री दामोदर वास्को शारांची ग्रामदेवता. भक्तांची ताचेर आशिल्ली उपाट स्रद्धा आनी देव दामोदराचो आपल्या भक्तांचेर उपाट आशिर्वाद. ते खातीर व्हडा उमेदीन, भक्तीभावान सगले वास्कोकार सप्ता मनयतात.
दरेका समाजाचे आनीहौशी भजनी मंडळां थारायिल्या वेळार दामोदर देवळांत भजन करून श्री दामोदराची सेवा करतात. दामोदर सप्ताक लागून पुराय वास्को शारांत उमेदीचें तशेंच भक्तिमय वातावरण पातळटा. दामोदर देवळाच्या वाठारांत फेरी भरता जी पुराय एक सप्तक आसता. सप्तका वेळार सांजेच्या 7 उपरांत दरेका समाज आनी बाजारकार मंडळी आपापलो पार (देखाव), भजन दिंडी घेवन देवळांत येतात आनी श्री दामोदराक श्रीफळ ओंपतात. सगले वास्कोशार ‘ज्ञानबा तुकारामाच्या’ जयघोशांत भारावन वता.
कोरोना म्हामारी काळांत फाटलीं दोन वर्सां वास्को सप्ता भौशीकरितीन मनोवंक नाशिल्लो. पूण अंदूं सप्ता व्हड उमेदीन मनयतले. भाविकांची व्हड गर्दी जावपाची शक्यताय आसा. बुधवारा फांतोडेच्यान सकाळीं 11 वरां मेरेन भाविकांक श्री देव दामोदराचे दर्शन घेवपाक मेळटलें. ते उपरांत हेर धर्मीक विधी तशेंच श्री दामोदराक श्रीफळ दवरतले. ते खातीर दनपारां दोन वरां मेरेन भाविकांक मंदिरांत प्रवेश मेळचो ना. दोन वरां उपरांत परतून भाविकांक देवदर्शन घेवपाक मेळटलें.
मुरगांव हिंदू समाजान वास्को सप्ता निमतान दनपारां 1 ते रातीं 8 वरां मेरेन श्री दामोदर मंदिराच्या फाटले वटेन आशिल्ल्या सारस्वत बँके लागसार अन्नप्रसाद सेवेचे आयोजन केलां. भाविकांनी हाचो लाव घेवचो. तशेंच श्री दामोदर भजनी सप्ता उत्सव समिती (बाजारकार) वगळून हेर समाजा वतीन पार, दिंडी आयोजीत केल्या.
श्री दामोदर पुनप्रतिश्ठान वर्धापन दिसा निमतान मंगळारा सांजे श्री दामोदर मंदिराच्या मांटवांत पं. जयतीर्थ मेवुंडी (धारवाड) हांच्या सुश्राव्य गायनाची कार्यावळ जाली.
आयच्यान सप्ता निमतान वास्कोंतले येरादारींत बदल केल्यात.