भांगरभूंय | प्रतिनिधी
फाटले दोन म्हयने आशिल्लो बंद; गोंयकारांक मेळटलें ताजें नुस्तें
पणजी: गोंयांत फाटले दोन म्हयने बंद आशिल्ली नुस्तेमारी आयज (सोमारा) सावन परतून सुरू जाता. फाटले दोन म्हयने जेटीचेर नांगरून दवरिल्ल्यो बोटी आयज परतून नुस्तेमारी खातीर दर्यांत वतल्यो. जून आनी जुलय अशे दोन म्हयने नुस्तेमारी हंगाम बंद आसता. आयज सावन नवे नुस्तेमारी हंगामाक सुरवात जातली.
दोन म्हयने नुस्तेमारी बंद आशिल्ल्यान नुस्तेमारी कामगार आपल्या गांवांनी गेल्ले. थोडे आपल्या कामाचेर पावल्यात जाल्यार कांय जाण अजून आपल्या कामाचेर पावूंक नाशिल्ल्यान आयज कांय मेजक्योच बोटी नुस्तेमारी खातीर वतल्यो. ल्हान बोटी पयली वतल्यो. उपरांत मोट्यो बोटी कामगार आयले उपरांत वतल्यो. फुडले 15 दीस सगल्यो बोटी दर्यांत वतल्यो. कामगार येवपाक सुरवात जाल्या अशें मांडवी फिशरमॅन मार्केटींग कॉर्पोरेशनाचे अध्यक्ष सीताराम परब हांणी सांगलें.
वास्को, बेतूल, कोलवें ह्या दक्षीण गोंयातल्यो बोटी आयज सावन नुस्तेमारी खातीर वतल्यो जाल्यार मालीम जेटी वयल्यो ल्हान बोटी आयज सावन वतल्यो. अजून कांय सुवातींनी वातावरण पेड्डेर आशिल्ल्यान बोटींक त्रास जातलो. तशेंच रेंवेंच्या थराक लागून बोटींक दर्यांत वचपाक त्रास जाता. जशें वातावरण योग्य जातलें तश्यो सगल्यो बोटी दर्यांत वतल्यो अशें ह्या वेळार परब हांणी सांगलें.
आयज सावन नवो नुस्तेमार हंगाम सुरू जायत आशिल्ल्यान फाटले दोन म्हयने ताज्या नुस्त्या खातीर उत्सूक गोंयकारांक आतां ताजें नुस्तें मेळटलें. फाटले दोन म्हयने नुस्त्या खातीर लोक आतूरतायेन वाट पळयताले. झेलांतल्या नुस्त्याचेर समाधान मानचें पडटालें. पूण आतां ताजें नुस्तें मेळटलें. श्रावण म्हयनो सुरू जाल्ल्यान नुस्त्याक मागणी उणी आसतली. पूण नुस्तेमार हंगाम सुरू जाल्ल्यान नुस्त्याची आवक वाडटली. ताका लागून नुस्त्याचीं मोलां सकयल देंवपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
