भांगरभूंय | प्रतिनिधी
पणजी : भाजपांत प्रवेश केले उपरांत काँग्रेसीचे बदनामी खातीर संकल्प आमोणकार हे काँग्रेस फुडाऱ्यांचेर आरोप करीत आसात. तांच्या आरोपांत तथ्य ना. दोन खेपे हारून लेगीत संकल्पाक तिसरे खेपे मुरगांवची उमेदवारी दिल्या, अशें आदले कॉंग्रेसीचे प्रदेशाध्यक्ष गिरीश चोडणकार हांणी म्हणलें.
काँग्रेसीच्या फुडाऱ्यांनी उमेदवारी दिवपाक पयशे घेतले. बारा मतदारसंघांनी तिकेटी विकल्याे, असो आरोप संकल्प आमोणकारान केल्लो. प्रभारी दिनेश गुंडू राव आनी के. सी. वेणुगोपाळ हांचेर तांणी भ्रश्टाचाराचे आरोप केल्ले. हे आरोप आदले अध्यक्ष गिरीश चोडणकार हांणी न्हयकारल्यात. उमेदवारी निश्चीत करपाचे प्रक्रियेंत के. सी. वेणुगोपाळ हे खंयच नाशिल्ले. उमेदवार निश्चीत करपा खातीर खासा समिती आशिल्ली. समितीन उमेदवार थारायल्यात अशें चोडणाकरान सांगलें.
संकल्प आमोणकार हांकां म्हत्वाचीं पदां काँग्रेसीन दिल्यांत. युवक काँग्रेसीचें अध्यक्षपद तशेंच काँग्रेसीचे ते उपाध्यक्ष आशिल्ले. आमदार जाले उपरांत पक्षान पालवी विधीमंडळ फुडाऱ्याचें पद तांकां दिल्लें. हाचे पयली मुरगांव मतदारसंंघांत दोन वेंचणुकांनी ते हारिल्ले. तरी लेगीत पक्षान तांकां तिसरे खेपे उमेदवारी दिली आनी ते आमदार जाले अशें गिरीश चोडणकार हांणी म्हणलें.
राहूल गांधी हांचे भारत जोडो यात्रेक उपाट प्रतिसाद मेळटा. हे यात्रेक लागून भाजपाच्या फुडाऱ्यां मदीं भिरांत निर्माण जाल्या. हाका लागून भारत जोडो यात्रे वेळार भाजपान आमदार फोडले असो आरोप आदले अध्यक्ष गिरीश चोडणकार हांणी केलाे. राहूल गांधी हे समर्पीत फुडारी आसात. काँग्रेसीचे आमदार भाजपांत गेले म्हूण भारत जोडो यात्रेचेर परिणाम जावचो ना अशेंय चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
