भांगरभूंय | प्रतिनिधी
भांगरभूंय । प्रतिनिधी
केंपेंः बेतूल पंचायत घराचें काम हांव आडावपाचो यत्न करतां. नाका जाल्ले आरोप करून केंपें मतदारसंघाचो काँग्रेसचो आमदार एल्टन डिकॉस्ता हांणी आपलें नांव बदनाम करपाचे यत्न चलयल्यात असो आरोप आदले आमदार आनी उपमुख्यमंत्री चंद्रकांत (बाबू) कवळेकार हांणी केप्यां घेतिल्ले एके पत्रकार परिशदेंत केलो. तांच्या वांगडा बेतूल पंचायत सरपंच सेबी फर्नांडीस, उपसरपंच क्लामेंत फर्नांडीस, टिटो केरकार, आकांक्षा नायक आनी गुरुदास वेळीप आशिल्ले.
म्हजे 25 वर्सांचे आमदारकीचे कारकिर्दींत हांवें दुसऱ्यान केल्ल्या कामाचें स्रय घेवपाचो केन्नाच यत्न केलो ना. दुसऱ्यांचेर नाकाशिल्ले आरोप लेगीत हांवें केले नात. बेतूल पंचायत घराच्या कामा खातीर कवळेकारान फाटपुरवण केल्ली अशें मुख्यमंत्री डॉ प्रमोद सावंत हांणीच सांगल्लें. बेतूल पंचायत वाठारांत हांव रावतां तेन्ना पंचायत घऱाचें काम आडावन म्हाका कितें मेळटलें, असो प्रश्न कवळेकार हांणी डिकॉस्ता हांका विचारला.
एल्टन डिकॉस्ताक लोकांनी तांचीं कामा करपा खातीर आमदार म्हणून वेंचून काडलां. तांणी ताच्यान जातात तितलीं उदरगतीचीं कामां करची, मात हांवें जीं कामां केल्यांत तांचें स्रय घेवपाचें आनी कवळेकारान आमदार आसतना कांयच केलें ना हे लोकांक सांगपाचें बंद करचें असो सल्लो कवळेकार हांणी तांका दिला. बेतूल पंचायत घरा विशीं हांवें कितें कितें केलां हें समजून घेवपाचें आसल्यार आपल्या धा-पंधरा कार्यकर्त्यांक घेवून म्हजे वांगडा मुख्यमंत्र्याक मेळपाक वचया अशें उक्तें आव्हान तांणी डिकॉस्ता हांका दिलां.
खेळां प्रकल्प, तिळामळ मार्केट, केपें भलायकी केंद्र, बाळ्ळी भलायकी केंद्र, कुशावती न्हंयेचेर समांतर पूल, केपें पालिका इमारत, पुलीस स्टेशन, उदका पायपलायन ही आनी अशीं जायती उदरगतीचीं कामां आपणे आमदार आसतना केल्यांत. केंपें मतदारसंघांतल्या लोकांक तें खबर आसा अशें कवळेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
