भांगरभूंय | प्रतिनिधी
उत्कृश्ट बॉलिंगेच्या आनी बॅटिंगेच्या नेटार भारतान दुसरे वन डे मॅचींत येजमान झिम्बाब्वेक 5 विकेटींनी हारयलो. ह्या जैता सयत भारतान तीन मॅचींचे माळेंत 2-0 अशी निर्णायक आघाडी घेतली.
शार्दुल ठाकुरान संदीचें भांगर करतना तीन विकेटी घेतल्यो. आशिया करंड सर्तीची तयारी करपाचे दिश्टीन डावाची सुरवात करपाक आयिल्ल्या लोकेश राहुल फक्त एक धांवडी करून परतलो. शिखर धवन, शुभमन गिल, संजू सॅमसन आनी दीपक हुड्डा हांणी बरी बॅटींग करून भारताचें जैत निश्चीत केलें.
ते पयलीं सीन विलियम्स (42) आनी रायन बर्ल (नाबाद 41) हांणी झिम्बाब्वे वतीन संघर्श केलो. पूण, तांकां अपेक्षीत साथ मेळूंक ना. कैटानो आनी इनोसेंट काइया ही जोडी डावाची सुरवात करपाक आयली. तांणी 8.4 ओव्हरींनी फक्त 20 धांवड्यो केल्यो. मोहम्मद सिराजान पयलो धपको दितना कैटानोक (7) बाद केलो. संजून विकेटी फाटल्यान ताची कॅच धरली. ते उपरांत शार्दुलान 12वे ओव्हरीच्या पयल्या आनी अखेरच्या बॉलाचेर विकेटी घेतल्यो.
प्रसिद्ध कृष्णान चवथो धपको दिलो. सिकंदर रजा आनी सीन विलियम्स हे जोडयेन 50 बॉलांनी 41 धांवड्यो केल्यो. विलियम्सान 42 बॉलांनी 3 चवके आनी एका सक्याचे मजतीन 42 धांवड्यो केल्यो. रायन बर्ल 41 धांवड्यांचेर नाबाद उरलो. झिम्बाब्वेचो पुर्ण डाव 161चेर सोंपलो.
मजगतीं, अंदूंचे आयपीएला उपरांत राहुल एकूय आंतरराष्ट्रीय मॅच खेळूंक नाशिल्लो. चार म्हयन्यां पसून तो आंतरराष्ट्रीय क्रिकेटी पसून पयस आशिल्लो आनी जूनांत जर्मनींत ऑपरेशन केलें. जुलय पसून ताणें सरावाक सुरवात केली आनी ताची पंगडांत निवड लेगीत जाल्ली. पूण, वॅस्ट इंडिजाचे भोंवडे पयलीं ताका कोरोना जाल्ल्यान विंडिज भोंवडी चुकली. झिम्बाब्वे आडचे माळेंत ताणें पुनरागमन केलें. पयले मॅचींत ताका बॅटींग करपाची संद मेळूंक ना. बॅटिंगेचो सराव मेळचो म्हणून तो काल डावाची सुरवात करपाक आयलो. पूण, पांच बॉलांनी 1 धांवडी करून तो व्हिक्टर एनयाऊचीच्या बॉलाचेर एलबीडब्ल्यू बाद जालो.
भारताक पांच धांवड्यांचेर पयलो धपको बसलो. धवन आनी गिल हांणी दुसरे विकेटी खातीर 29 बॉलांनी 42 धांवड्यांची भागिदारी करून पंगडाक ट्रॅकाचेर हाडलो. अखेरेक धवन 33 धांवड्यो करून बाद जालो.
इशान किशनाच्या प्रदर्शनाचेर सगल्यांची नदर आशिल्ली. तो लेगीत खूब दिसांनी मैदानाचेर देंविल्लो. पूण, ताका लेगीत व्हड खेळी करपाक अपेस आयलें. तो स धांवड्यो करून तंबूंत परतलो. बाद जावचे पयलीं ताणें गिला वांगडा मेळून 34 धांवड्यांची भागिदारी केली.
संजू सॅमसन आनी दीपक हुड्डा हांणी 56 धांवड्यांची भागिदारी करून पंगडाक जैताच्या हुमऱ्यार हाडलो. हुड्डा 25 धांवड्यांचेर बाद जालो. संजून सको मारून भारताक पांच विकेटींनी जैत मेळोवन दिलें. ताणें 39 बॉलांनी 3 चवके आनी चार सक्यांचे मजतीन नाबाद 43 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
