भांगरभूंय | प्रतिनिधी
प्रकल्प, स्टार्टअपांक उर्बा दिवपाची मुख्यमंत्र्यांची सुचोवणी
भांगरभूंय I प्रतिनिधी
पणजी : नितळसाणींत गोंय देशांत दुसरे सुवातेर आसा. हे वळेरेंत पयली सुवात मेळोवपाक सगल्याच सरपंच, पंचांनी सरकाराक सहकार्य करचें. हाचे मुखार सलून तशेंच चिकन, मटण दुकानांतलो कोयर लेगीत कुंडयच्या बायोमेडिकल कोयर प्रक्रिया प्रकल्पांत धाडचो, अशें आवाहन मुख्यमंत्री डॉ. प्रमोद सावंत हांणी केलां.
स्वयंपूर्ण गोंय मोहीम येसस्वी करपाक राज्यभर नेमिल्ल्या स्वयंपूर्ण इश्टा सयत सरपंच आनी पंचांनी व्हर्च्युअल पद्दतीन संवाद करतना उलयताले. ‘स्वयंपूर्ण गोंय 1.0’ मोहिमे वरवीं 90 टक्के ध्येय पुराय केले उपरांत राज्य सरकारान ‘स्वयंपूर्ण गोंय 2.0’ मोहीम सुरू केल्या. ही मोहीम येसस्वी करपाची जापसालदारकी फक्त मुख्यमंत्री, मंत्र्यांचीच न्हय, जाल्यार हे खातीर हेर लोकप्रतिनिधीं सयत दरेक नागरिकांन योगदान दिवप गरजेचें, अशें मुख्यमंत्र्यान म्हणलें.
राज्यांतलें भाजप सरकार अंत्योदय तत्वाचेर काम करतां. ताका लागूनच ‘स्वयंपूर्ण गोंय 1.0’ मोहिमे खाला केंद्र आनी राज्य सरकाराच्यो येवजण्यो तळागाळा मेरेन पावोवन ग्रामीण लोकांची सर्वांगी उदरगत करपाचो सरकारान यत्न केला. अजुनूय ज्या नागरिकांचे प्रस्न, समस्या सुटाव्यो जावंक नात, तांचे मेरेन पावून तांकां थाकाय दिवपाचो यत्न स्वयंपूर्ण इश्ट अानी थळाव्या पंचांनी करपाक जाय, अशें तांणी सांगलें.
सरपंच, पंचांनी आपल्या पंचायत क्षेत्रांत नव्या प्रकल्पांक उर्बा दिवप, कुळटाय प्रशिक्षीत तरणाटे तयार करप आनी स्टार्टअपांक उर्बा दिवप हाचेरूय भर दिवपाक जाय, अशें तांणी म्हणलें.
‘व्होकल फॉर लोकल’ खाला गोंयकारां कडल्यान थळाव्या उत्पादनांक प्रोत्साहन दिवपाचे यत्न सरकारा कडल्यान सुरू आसात. दिवाळी खातीर अाकाशदिवो सयत हेर वस्तू थळाव्यांनी स्वता तयार केल्यात. त्यो विकत घेवन गोंयकारांनी थळाव्या कलाकारांक उर्बा दिवपाक जाय, अशें मुख्यमंत्र्यान म्हणलें. हेच फाटभुंयेर गोंयांतल्या नासणी उत्पादनाक प्रोत्साहन दिवन तातूंत वाड करपाचे यत्न जैवविवीधता मंडळा कडल्यान सुरू आसात, अशें तांणी नमूद केलां.
मजगतीं, स्वयंपूर्ण गोंयच्या पयल्या टप्प्यांत राबयिल्ल्या ‘सरकार तुमच्या दारांत’ मोहिमेक राज्यभरांतल्यान उपाट प्रतिसाद मेळ्ळा. ही मोहीम नोव्हेंबराच्यान परतून सुरू करतले. ते भायर ‘मंत्री तुमच्या दारांत’ उपक्रमा खाला इकराय मंत्री तांकां नेमूद दिल्ल्या मतदारसंघांतल्या उरिल्ल्या वाठारांनी वचून थंयच्या लोकांच्यो समस्या जाणून घेतले आनी त्यो सुटाव्यो करपाची प्रक्रिया बेगोबेग सुरू करतले, अशें मुख्यमंत्री. डॉ. प्रमोद सावंत हांणी सांगलें.
दोन लाख रोजगाऱ्याच्यो संद
गोंयांतल्या हॉटेल क्षेत्रांत फुडल्या कांय वर्सांत 2 लाख रोजगार संद उपलब्ध जातल्यो. हे संदीचो लाव घेवपाक तरणाट्यांक ते नदरेन प्रशिक्षण घेतल्यार तांकां नोकरेची संद मेळटली. तशेंच गोंय स्वयंपूर्ण जातलें, अशें मुख्यमंत्री डॉ. प्रमोद सावंत हांणी म्हणलें.
सेवा ऑनलायन दियात
राज्य सरकारान 121 सेवा ऑनलायन केल्यात. सगल्याच पंचायतींनी नागरिकांक ह्यो सेवा ऑनलायन पद्दतीन दिवपाचो यत्न करचो. ते खातीरचे पुराय सहकार्य तांकां सरकारा कडल्यान मेळटलें. सेवा ऑनलायन दिल्यार गांवगिऱ्या लोकांक उपजिल्होधिकारी वा मामलेदार कार्यालयांत खेपो मारच्यो पडच्यो नात, अशें मुख्यमंत्री डॉ. सावंत हांणी सांगलें.
सैमीक शेतीक उर्बा दिवप गरजेचें
राज्यांतल्या शेतकारांक सैमीक पद्दतीन शेती करपाक उर्बा दिवप गरजेचें. ही जापसालदारकी स्वयंपूर्ण इश्ट तशेंच पंचांची. गोंय ल्हान राज्य अाशिल्ल्यान सैमीक शेतीक निश्चीत येस मेळटलें. सैमीक शेती करपी गोंय देशांतले पयलें राज्य थारतलें, असो विस्वास मुख्यमंत्री डॉ. सावंत हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
