भांगरभूंय | प्रतिनिधी
माशेलः सांतिस्तेव्ह पंचायतींतल्या आखाडो आनी करपीन ते सेंट इस्तेव्ह चर्च मदल्या पाटो रस्त्याचे कुशीक अज्ञात मनशान रातच्या वेळार बियरीच्यो काशी उडयल्यात. ह्या काशींक लागून गांवांत आरथी परथी चर्चा चल्ल्या.
आखाड्यार श्री सांखळ्यो देवस्थाना लागसार कोणेतरी राती वेळार भरिल्ल्यो पांच बियरीच्यो काशी हाडून उडयल्यात. तशेंच पाटो मुख्य रस्त्याचे कुशीक तीन भरिल्ल्या बियरींच्यो काशी तशेंच आनीक एके कडेन भरिल्ल्या बियरींच्यो दोन काशी उडयल्यात. ह्या रस्त्या वयल्यान येरादारी आनी लोकांची यो- वच चालू आसता. ते भायर सकाळीं आनी सांजे वेळार कितलेशेच लोक ह्या रस्त्याचेर चलपा खातीर येतात. तांचे नदरेक ही गजाल पडूंक नाशिल्ली. पूण एका जागृत नागरिकान त्यो काशी उक्त्यो करून पळयल्यो तेन्ना ही गजाल सगळ्याक पावली. उपरांत खूब जाणांनी त्यो बियरी येवन पळयल्यो, पूण एकल्यानूय तातूंतली एक लेगीत बाटली काडपाचें धाडस करूंक ना. हे घडणुकेक दोन दीस जाले तरीय श्री सांखळ्यो देवस्थाना कडल्यो पांच काशी अजुनूय थंयच आसात. पाटो रस्त्या कुशीक उडयिल्ल्यो त्यो मात कोणेतरी फायरायल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
