आंतर मिडिया क्रिकेट सर्तः प्रुडण्ट मिडिया वस्ताद

भांगरभूंय | प्रतिनिधी

प्रुडण्ट मिडियाच्या पंगडान आंतर मिडिया मर्यादीत ओव्हरींची क्रिकेट सर्त जिखली. फायनलींत ताणें टायम्स ऑफ इंडियाच्या पंगडाक 25 धांवड्यांनी हारयलो.

स्पोर्ट्स जर्नलिस्ट असोसिएशनान (एसजेएजी) गोंय खेळां प्राधिकरण आनी गोंय क्रिकेट संघटणेच्या जोड पालवान सर्तीचें आयोजन केल्लें.

सांगें क्रिकेट अकादमीच्या मैदानाचेर जाल्ले फायनलींत प्रुडण्ट मिडियान टॉस जिखून पयलीं बॅटींग करपाचो निर्णय घेतलो आनी निर्धारीत 10 ओव्हरींनी 5 विकेटी वगडावन 100 धांवड्यो केल्यो. लक्ष्मण गवंडेन सगल्यांत चड 32 बॉलांनी 62 धांवड्यांची खेळी केली. मोखीचो फाटलाव करतना टायम्स ऑफ इंडियाक 10 ओव्हरींनी 6 विकेटी वगडावन 75 धांवड्यां मेरेन मजल मारप शक्य जालें.

प्रुडण्ट मिडियाक 15 हजार आनी करंड, जाल्यार टायम्स ऑफ इंडियाक 10 हजार आनी करंड फावो जालो.

समाज कल्याण मंत्री सुभाष फळदेसाय इनामां भेटवण सुवाळ्याक मुखेल सोयरे म्हणून उपस्थीत आशिल्ले. तशेंच सुवाळ्याक गोंय क्रिकेट संघटणेचे सचीव रोहन गांवस देसाय, टायम्स ऑफ इंडियाचे संपादक राजेश मेनन, गोवा युनियन ऑफ जर्नलिस्टाचे अध्यक्ष राजतिलक नायक, धीरज म्हांबरे, समीर नायक आनी अनिरुद्ध रावूळ हे उपस्थीत आशिल्ले.

थोडे भितर धांवतकटोः प्रुडण्ट मिडिया, 10 ओव्हरींनी 5 बाद 100 धांवड्यो ( लक्ष्मण गवंडे 62, शैली 10 धांवड्यो, रोहन श्रीवास्तव 2, प्रसाद पाटील आनी रॉय बार्रेटो दरेकी एक विकेट) जैत आड टायम्स ऑफ इंडिया, 10 ओव्हरींनी 6 बाद 75 धांवड्यो (प्रसाद पाटील नाबाद 35, गोपी कालवार 10 धांवड्यो, अविनाश जोशी 3-10, पवन झांटये 2-12).

हेर वैयक्तीक इनामांः प्रसाद पाटील (उत्कृश्ट बॅट्समन आनी सर्तींतलो खेळगडो, टायम्स ऑफ इंडिया), लक्ष्मण गवंडे (फायनलींतलो खेळगडो, प्रुडण्ट मिडिया), अभिजीत जाधव (उत्कृश्ट विकेटकीपर, प्रुडण्ट मिडिया), अविनाश जोशी (उत्कृश्ट बॉलर, प्रुडण्ट मिडिया), राजेश मेनन (फायनलींतली उत्कृश्ट कॅच, टायम्स ऑफ इंडिया), तरुण भारत (शिस्तीचो पंगड).