अ. गो. क्षत्रीय मराठा समाज वेंचणुकेंत सुहास फळदेसाय हांच्या पॅनलाक जैत

भांगरभूंय | प्रतिनिधी

फळदेसाय पॅनलाक 10,169, महेश गांवकार पॅनलाक 3337 मतां

पणजी, प्रतिनिधीः अखील गोमंतक क्षत्रीय मराठा समाजाच्या (96 कुळी मराठा) 2023 ते 2026 ह्या तीन वर्सांच्या कार्यकाळा खातीर आयतारा जाल्ले वेंचणुकेंत सुहास फळदेसाय हांच्या फुडारपणा सकयल्या पॅनलाक जैत फावो जालें. ह्या समाजाचे अध्यक्ष महेश नायक गांवकार हांच्या पॅनला आड सुहास फळदेसाय हांच्या पॅनला मदीं वेंचणूक जाली.
12 तालुक्यांच्या 12 केंद्रीय वांगडी पदां खातीर हें मतदान घेतलें. वट्ट 24 उमेदवार आशिल्ले. सकाळीं 9 ते सांजवेळार 5 वरां मेरेन मतदान जाले उपरांत मतमेजणेक सुरवात जाली. रातच्या 11 वरांचेर ती पुराय जावन निकाल जाहीर केलो. हे वेंचणुकेच्या निकालांत सुहास फळदेसाय हांच्या पॅनलाक जैत मेळिल्ल्याचें स्पश्ट जालें.
म्हाला प्रमाण निकाल- बार्देस- जगन्नाथ देसाय (340), लक्ष्मण परब (799), दिवचले- शंकर महाले (861), सुदेश रावत (289), काणकोण- दिप्तेश देसाय (841), महेश नायक गांवकार (286), धारबांदोडें- अनिल सावंत देसाय (772), प्रदीप देसाय (352), मुरगांव- प्रेमानंद गांवस (809), गुरूदास शेटगांवकार (311), पेडणें- अॅड. अमित सावंत (937), अॅड. अर्जुन शेटगांवकार (206), फोंडें- महादेव प्रभुदेसाय (239), संजय देसाय (838), केपें- संजय नायक देसाय (280), सुहास फळदेसाय (807), साश्ट- मिलिंद देसाय (269), विजयकुमार कोप्रे देसाय (861), सांगें- बाबुराव देसाय (263), इच्छीत फळदेसाय (871), सत्तरी- दुलबाराव देसाय (880), म्हाळू गांवस (248), तिसवाडी- डॉ. मनोज प्रभुदेसाय (893), रामा परब (254) अशीं मतां नोंद जालीं. दरेका मतदाराक 12 वांगड्यां खातीर मतदान करपाचो अधिकार आशिल्लो. महेश गांवकार पॅनलाक 3337, सुहास फळदेसाय पॅनलाक 10,169 मतां मेळ्ळीं.
पेडणें म्हालांतल्यान सुहास फळदेसाय हांच्या पॅनलांतल्यान वेंचणुकेक देंविल्ले मांद्रेंचे सरपंच अॅड. अमित सावंत हांकां 937 मतां मेळ्ळी. जाल्यार तांचे आड बशिल्ले महेश गांवकार पॅनलाचे अॅड. अर्जुन शेटगांवकार हांकां 206 मतां मेळ्ळीं.
वेंचणुके उपरांत सांगेंचे आमदार तशेंच समाज कल्याणमंत्री सुभाष फळदेसाय हांणी खासा हाजीर रावन जैतिवंत पॅनलाक परबीं भेटयलीं आनी सांगलें, ही वेंचणूक केंद्रीय समिती वेंचून काडपाची एक लोकशाय प्रक्रिया जावन आसा. वेंचणुके उपरांत सगळे तरेचे मतभेद आनी राजकारण कुशीक दवरून सगळ्यांनी समाजा खातीर एकवटान काम करपाची गरज आसा. सगळ्यांक विस्वासांत घेवन काम करचें.
सुभाष फळदेसाय हांचे वांगडा नावेलीचे आमदार तशेंच कदंब महामंडळाचे चेअरमन उल्हास नायक तुयेंकार, कुंभारजुवेंचे आमदार राजेश फळदेसाय, दिवचलचे आमदार डॉ. चंद्रकांत शेट्ये, आदले मुख्यमंत्री लक्ष्मीकांत पार्सेकार हांणीय मतदान केलें. तुळशीदास पंढरी देसाय, रमेश यशवंत गांवकार आनी प्रकाश केशव गांवस हांणी वेंचणूक अधिकारी म्हणून काम पळयलें.