भांगरभूंय | प्रतिनिधी
पणजी: अॅपटॅक एव्हिएशन अॅकॅडमी बेळगांवच्या 11 विद्यार्थ्यांची भारतांतल्या विवीध विमानतळ आनी विमान कंपन्यांनी नेमणूक जाली.
अकादमींत येसस्वीपणान प्रशिक्षण पुराय केल्या उपरांत ते तांच्या संबंदीत एअरलायन्स आनी विमानतळांचेर बेगीनूच रुजू जातले. हांतले चडशे विद्यार्थी गांवगिर्या वाठारांतल्यान आयल्यात आनी तांणी तांचें मुळावें शिक्षण कन्नड-मराठी भाशेंतल्यान पुराय केलां. सोमारा सकाळीं अकादमीच्या सभाघरांत ह्या विद्यार्थ्यांची भोवमान कार्यावळ जाली.
गांवगिर्या वाठारांतल्यान आयिल्लीं हीं तरणाटीं बरे तरेन इंग्लीश उलोवपाक लागिल्ल्यान तांचे घरचीं अजापीत जालीं. कोल्हापूर, बेळगांव, सातारा आनी सांगली जिल्ह्यांल्या गांवगिर्या वाठारांतल्या ह्या तरणाट्यांनी आपले अणभव ह्या वेळार सांगलें.
आमी अकॅडमीतल्या विद्यार्थ्यांक विमान वाहतूक उद्देगाच्या सगळ्या पैलूंचेर पुरायेन प्रशिक्षीत करता आनी तांचें करिअर पर्जळपा खातीर, तांकां पुरायेन प्रशिक्षीर करपाक कितेंच उणें करिना अशें अॅपटॅकचे संचालक विनोद बामणे हांणी सांगलें.
ह्या विद्यार्थ्यां मदल्या खुशी भंडारीची विस्तारा एअरलायन्सांत कॅबीन क्रू (एअर होस्टेस) म्हणून नेमणूक केल्या. तशेंच एनकाल्म कंपनीन यल्लप्पा चौगुले, विनोद पट्टनशेट्टी, रोहन कांबळे, तमीम अत्तार, राहुल हारुगोप्पा आनी नवीन रेवडी ह्या स विद्यार्थ्यांची गोंयच्या मोपा आंतरराष्ट्रीय विमानतळाचेर सेवादिवपा खातीर नेमणूक केल्या. जाल्यार सोहेल सोनीकर, उमेश होंगेकर, कल्याणी जाधव आनी लक्ष्मी चनेगेरी ह्या चार विद्यार्थ्यांची हैदराबाद आंतरराष्ट्रीय विमानतळा खातीर नेमणूक जाल्ल्याचें विनोद बामणे हांणी सांगलें.
कन्नड अभिनेतो रंजन छत्रपती आनी हॉलिवूड चित्रपटांनी एंट्री करपी बॉलिवूड अभिनेतो राज पुरोहीत हे मानाचे सोयरे म्हणून ह्या वेळार हाजीर आशिल्ले. सरस्वती इन्फोटेकची संचालिका ज्योती बामणे, विकी सुभेदार, शाखा वेवस्थापक प्रकाश पाटील, ज्येश्ठ पत्रकार लुईस रॉड्रिग्ज ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
