भांगरभूंय | प्रतिनिधी
राज्यपालः पेडणें मतदारसंघांतल्या सरपंच, उपसरपंच तशेंच पंच वांगड्यां कडेन संवाद
भांगरभूंय । प्रतिनिधी
पेडणें: भारताची उदरगत गांवगिऱ्या वाठाराचे उदरगतीचेर निंबून आसा. ते नदरेन भारतांतल्या विवीध राज्यांची उदरगत जाता. गोंयांतूय पंचायत वाठारांची उदरगत बरे तरेन जायत आसा. गोंयांतल्या गांवगिऱ्या वाठारांनी आयज लेगीत बरो सैम पळोवपाक मेळटा. शार वाठारां परस गांवगिरो वाठार सोबीत सैमान नटला. पेडणेंचो सैम पंचायत मंडळ आनी सगळ्या पंच वांगड्यांनी सांबाळून दवरचे खातीर यत्न करचे. फुडारांत आमची वळख. आमच्या गांवाचें अस्तित्व हेच सैम गिरेस्तकायेंतल्यान तिगून उरतलें, अशें राज्यपाल पी. एस. श्रीधरम पिल्लई हांणी सांगलें. ते पेडणें मतदारसंघांतल्या सरपंच, उपसरपंच तशेंच पंच वांगड्यां कडेन संवाद सादताले. ही कार्यावळ धारगळे सभाघरांत जाली.
ह्या वेळार माचयेर धारगळ जिल्हो पंचायत वांगडी मनोहर धारगळकार, तोरशें जिल्हो पंचायत वांगडी सीमा खडपे, धारगळचे सरपंच अनिकेत साळगांवकार, कोरगांवचे सरपंच समील भाटलेकार, पोरस्कडे अमेरे खाजनेची सरपंच निशा हळदणकार, उगवें मोपा तांबोशेचे सरपंच सुबोध महाले, तोरशेंची सरपंच प्रार्थना मोटे, कासरवर्णेची सरपंच सुवर्णा केणी, वझरीचे सरपंच अनील शेट्ये, इब्रामपूर हणखणेचे सरपंच अशोक धावसकार, चांदे हसापूरचे सरपंच तुळशीदास गांवस, हळर्ण तळर्णचे उपरसरपंच नारायण राऊळ, विर्नोडेची सरपंच सुजाता ठाकूर, राज्यपालाचे सचीव निरवर्धन, पेडणें म्हाल उपजिल्होधिकारी दीपक वायंगणकार, पेडणें म्हाल गटविकास अधिकारी मनीष केदार, अधिकारी संजू गांवकार हाजीर आशिल्ले.
पेडणें मतदारसंघांतल्या डायलिसीसच्या 14 दुयेंतींक राज्यपालान अर्थीक मजत दिली. हे मुखार कॅन्सराचे 30 तशेंच टीबी दुयेंतींक लेगीत अर्थीक मजत दितले अशें राज्यपालान जाहीर केलें.
पेडणें म्हालांत विवीध प्रकल्प येतात. ह्या प्रकल्पाच्या माध्यमांतल्यान पेडणेची उदरगत जातलीच मात पेडणेंच्या कलाकारांक तांची कला सादर करपा खातीर हक्काची अशी माची मेळची, हे खातीर रवीन्द्र भवना सारको प्रकल्प उबारपाची गरज आसा. हे संबंदांत राज्यपाल हांणी सरकारा कडेन आमचो प्रस्ताव मांडचो. तशेंच सावळवाड्यार इनडोर स्टेडियम आनी खेळां मैदान आसा. तेंवूय आमच्या पेडणेंच्या खेळगड्यां खातीर उक्तें करून दिवचें. पेडणेंच्या बेरोजगार तरणाट्यांक विवीध प्रकल्पांच्या माध्यमांतल्यान रोजगाराच्यो संदी मेळोवन दिवच्यो, अशी मागणी सुबोध महाले हांणी केली.
पेडणें म्हालांत विवीध प्रकल्प येवपाचे आसात. ह्या प्रकल्पां खातीर व्हड प्रमाणांत उदकाची गरज लागतली. ह्या प्रकल्पांक लागून आमकां फुडारांत उदकाचो गंभीर प्रस्न सतयतलो. सरकारान हाचेर गंभीरपणान विचार करून पेडणेंकारांक फावोशें उदक मेळटलें, हाचेर लक्ष दिवचें अशें तुळशीदास गवस हांणी मागलें.
ह्या वेळार पेडणें मतदारसंघांतल्या इकराय पंचायतीं वतीन सरपंचांनी विवीध सुचोवण्यांचो प्रस्वाक राज्यपालांक सादर केलो. धारगळेच्या लोकशिक्षण हायस्कुलाच्या विद्यार्थ्यांनी येवकार गीत सादर केलें. अनिकेत साळगांवकार हांणी येवकार दिलो प्रास्तावीक केलें. तशेंच तांचे हस्तुकीं राज्यपालांचो शाल, नाल्ल आनी भेटवस्तू दिवन भोवमान केलो. क्लीप वाझ हांणी सुत्रसंचालन केलें. सतीश धुमाळ हांणी उपकार मानले.
राजभवन हें लोकभवन थारचेः राज्यपाल
गोंयची भोंवडी करतना आपल्याक विवीध तरांचे अणभव आनी विवीध तरेचे मनीस मेळटात. गोंयकार बरे मनीस. गोंयची संस्कृती सांबाळपाक गोंयकार भर दितात. गांवगिऱ्या वाठारांक भेट दिले उपरांत मेळपी खोस उतरांनी सांगपाक जायना. गांवगिऱ्या वाठाराचें अस्तित्व तिगोवन दवरचे खातीर पंचायत मंडळांनी यत्न करचे. आपूण राजभवनांत आसता. तरी लेगीत हें राजभवन हें लोकभवन जावचें हे खातीर तुमी राजभवनाचेर येवचें. आपूण तुमचे कडेन आयलां, आतां तुमीय आपले कडेन येवचे, अशें राज्यपाल पी. एस. श्रीधरन पिल्लई हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
