भांगरभूंय | प्रतिनिधी
मनीस खंय उगडोच जल्माक येता. मनीस किद्याक, सगलीं जनावरांय बी उगडीच जल्माक येतात. तीं मरसर तशीच उरतात. पूण, मनीस रानवटी अवस्थेंतल्यान सभ्य जालो तेन्ना ताणें कांय गजाली सोडल्यो. तांतूंतली एक नग्नताय. मनीस पयली गुहेत रावतालो, मनशांक मारून ताचें मांस खातालो. संवसारात आजूय कांय कडेन मनशाचें मांस खावपी कॅनिबल्स् आसात. पूण मनीस जसो सुदारत गेलो, ताणें सभ्यताय आपणायली. देखून तो जनावरां परस वेगळो थारलो.
भर सभेंत द्रौपदीच्या वस्त्राक हात घालो म्हूण महाभारत घडलें हें ल्हानपणा सावन दर एक भारतीय आयकत आयला. द्वापर युगांत कपड्यांचेर हात घालप हें असभ्यतायेचें लक्षण आशिल्लें. तशें आजूय आसा.
कपडे आनी भारत हांचे व्हड नातें आसा. 150 वर्साच्या वसाहतवादात ब्रिटिशांनी भारताक लुटलें हे व्हड सत्य. ब्रिटिशांनी तयार केल्लो म्हाल आमी विकत घेवचो न्हय म्हूण ‘स्वदेशी’ चळवळ लोकमान्य टिळक हांच्या वेळा सावन सुरू जाली. महात्मा गांधीजीन ती आनीक मुखार व्हेली. ब्रिटिश, ब्रिटनांत तयार जावपी कपडो हांगां विकपाक सोदताले. तो विकत घेवचो न्हय म्हूण गांधीजीन सांगलें,
स्वता चरख्याचेर सूत कापात, लुगटां तयार करात. आपलें आनी कस्तुरबाचें लुगट गांधीजी स्वता तयार करतालें खंय. जांकां सूत कापपाक जमना, तांणी खादी विकप. त्या तेपार चरख्यार सूत कापप, खादी वापरप हें देशभक्तीचें लक्षण आशिल्लें. चरखो हो स्वावलंबनाचें चिन्न जालें. आजूय देशात जायतें हातभाग वाठार आसा. पर्यटना फाटल्यान हँडलूम हें दुसरें येणावळीचें माध्यम. भारताच्या दर एका राज्यांत तयार जावपी वेगळ्या वेगळ्या तरेचीं लुगटां हो संशोधनाचो विशय. पूण आमी आमच्या देशात तयार जावपी लुगट वापरतात ? ना.
जांकां नवी पिळगी आदर्श मानतात, तें नट, नटयो, खेळगडे आंतराष्ट्रीय बाजारात तयार जावपी लाखांनी रूपयांचे कपडे वापरतात. नट, नटयो लाखांचे कपडे घालतात, तशे प्रसिद्धी, पयशां खातीर कपडे काडटातूय बी. हालींच एका नटान अमेरिकेच्या एका म्हयन्याळ्या खातीर उगडो फोटो काडलो. ताचेर बरीच चर्चा रंगली. हरशी लाखांनी रूपयाचें कपडे घालपी हो नट निवळ प्रसिद्धी आनी घडये पयशा खातीर उगडो जावन फोटो काडटा हाचें समर्थन जांवू नजो. एका नटयेन म्हळें, ‘‘सदांच बायलो उगड्यो जातात. आता आमकांय दोळ्यांक सूख मेळूं दी.’’
खरें म्हणल्यार आमच्या देशाक कपडे त्यागपाचोय इतिहास आसा. देशातल्यां चडशां लोकां कडेन घालपाक जाय तशें कपडे ना, देखून गांधीजी फकत पंचो नेसून भोवतालें. शिंयात लेगीत अशेच अर्दे उगडे भोवतालें. ज्या ब्रिटनाच्या राजाक मेळपाक ‘ड्रॅस कोड’ आसतालो, तो मानिनासतना,
तत्वाक पाळो दिवन गांधीजी तशेच पंचो न्हेसून राजाक मेळ्ळें. देशातल्या गरीब लोकांक कपडे ना ह्या तत्वां खातीर पंचो गुटलावन भोवपी राष्ट्रपिता आनी प्रसिद्धि खातीर उगडो जावपी कोट्याधीश नट हांतलो फरक जेन्ना आमकां कळटलो, एदो व्हडलो त्याग कळटलो, तेन्ना घडये आमी सभ्यतेच्या वाटेर चलपाक लागतलीं. 75 व्या स्वातंत्र्य दिसा निमतान ही आस बाळगू येता.
संपदा कुंकळकार
98501 49319
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
