भांगरभूंय | प्रतिनिधी
काँग्रेसीचे म्हणयारे एल्वीस गोम्स हांचो आरोप
पणजी: मांडवी न्हंयचे देगेर अश्टमीची फेरी दर वर्सा भरता, आनी दर वर्सा ह्या अर्जां खातीर गोंदळ जाता. ह्या वर्साय तसोच प्रकार पणजी म्हापालिकेंत घडलो. अर्ज विक्रेत्यांक दिनासतनाच ते काळ्या बाजारांत विकले असो आरोप काँग्रेसीचे म्हणयारे एल्वीस गोम्स हांणी पत्रकार परिशदेंत केलो.
लिपचोरयां मार्गान हे अर्ज विकतात, पूण सर्वसामान्य विक्रेत्यांक ह्या अर्जा खातीर रांगेंत उबें रावचें पडटा. रांगो लावन लेगीत तांकां निमाणें मेरेन अर्ज दिनात. उरफाटें लाठीचार्ज करून गोंदळ घालतात. आपल्या मनशां खातीर हे अर्ज राखून दवरतात असोय आरोप गोम्स हांणी केलो.
15 ऑगस्टाक तिरंगो हातांत दिवन राष्ट्रभावना सरकारान निर्माण केली आनी 16वेर भारतीयांचेर लाठीचार्ज केलो. अश्टमीचे फाटभुंयेर ही फेरी भरता आनी गरजेच्यो वस्तू विक्रे खातीर दवरतात. सुमार 400 परस चड अर्ज म्हापालिकेन काडिल्ल्याची म्हायती मेळिल्ली. पूण तातूंतले फक्त 50 अर्जूच दिले. म्हापालिकेचे कचेरे मुखार सकाळ सावन शेंकड्यांनी अर्जधारक रांगेंत उबे आशिल्ले आनी तांकां बोवाळ घालपा खातीर म्हापालिकेन प्रवृत्त केलें असो आरोप एल्वीस गोम्स हांणी केलो.
खोलायेन चवकशी जावची
200 रुपयाक एक अर्ज दितात. हे अर्ज काळ्या बाजारांत चडावत रुपयांनी विकतात अशी म्हायती मेळ्ळ्या. हाची चवकशी करपाची गरज आसा. आमी 21व्या शेंकड्यांत रावतात. पणजी स्मार्ट सिटी खातीर कोट्यांनी रुपयांचाे खर्च सरकार करता. तरी अश्टमीचे अर्ज ऑनलायन पद्दतीन कित्याक उपलब्ध करिनात? असो प्रस्न एल्वीस गोम्स हांणी उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
