भांगरभूंय | प्रतिनिधी
मनभुल
–
हिंदी सिनेसृश्टीचो व्हडलो सुपरस्टार राजेश खन्नान फाटोफाट 17 हीट सिनेमा दिल्यात. ताची स्टायल आवडपी लाखांनी रसिक तेन्ना आशिल्ले. ताच्या वाट्याक गाजिल्लीं बरींच पदां आयल्यांत. राजेश खन्नाचो एक रोमँटीक सिनेमा 28 जानेवारी 1972 दिसा आयलो. ताचें नांव अमरप्रेम.
अमरप्रेमाचे दिग्दर्शक शक्ती सामंता. बंगाली सिनेमा निशी पद्मा (1970) वयल्यान तो केल्लो. सावत्र आवय छळ करता, म्हूण तो शेजारी रावपी शिंदळकेक आवय मानता. ही भुमिका शर्मिला टागोर (पुष्पा) हिणें केल्ली. तर राजेश खन्ना (आनंद बाबू) थंय येवपी वेवसायीक. संगीतकार आर. डी. बर्मन. गीतकार आनंद बक्षी.
हेर कलाकार आशिल्ले, नंदू (मास्टर बाॅबी, विनोद मेहरा), नेपाली बाबू (मदन पुरी), नंदूची आवय (बिंदू), नटवरलाल (ओम प्रकाश). घरांतल्यान धांवडायिल्लें पुष्पा शिंदळकी जाता. तिच्या गायनाचेर आनंद बाबू भाळटा. सद्दां तिचे कडेन येता. थंय शेजारी ल्हान नंदूचे कुटुंब रावता. तो पुष्पाक आवय मानता. …. व्हडलो जातकच तो पुष्पाक मेळपाक येता, वांगडा आनंद बाबू. मागीर…..
अमरप्रेमांतलीं डोली में बिठाई के (एस. डी. बर्मन), रैना बिती जाये (लता मंगेशकार), चिंगारी कोई भडके, ए क्या हुआ, कुछ तो लोग कहेंगे (किशोर कुमार), बडा नटखट है ये (लता मंगेशकार) हीं पदां गाजिल्लीं. भारत- पाकिस्तान झुजाक लागून हो सिनेमा आडकून उरिल्लो. उपरांत कांय म्हयन्यांनी रिलीज जालो.
अमरप्रेमाक आठ फिल्मफॅर नामांकनां मेळ्ळीं. पूण तीनूच पुरस्कार मेळ्ळे. पटकथा, आवाज, संवाद (रमेश पंत). अभिनेतो, अभिनेत्री, संगीत, गीत, गायक हे पुरस्कार मेळ्ळे नात. हाचे वयल्यान कितली सर्त आसताली ताची कल्पना करची. त्या वर्सा बेईमानाक उत्कृश्ट सिनेमा, दिग्दर्शक, अभिनय (मनोज कुमार), सहायक अभिनय (प्राण) अशीं सात इनामां मेळ्ळीं. हेमा मालिनी (सीता और गीता) उत्कृष्ट अभिनेत्री थारली. सहायक अभिनेत्रीचें इनाम झीनत अमानाक (हरे रामा हरे कृष्णा) मेळ्ळें. संगीतकार (शंकर जयकिशन – बेईमान), मुकेश, (जय बोलो बेईमान की), आशा भोसले- (दम मारो दम)… त्या वर्सा सर्गेस्त मिनाकुमारीक पाकिझा खातीर पुरस्कार दिवंक ना म्हूण बोवाळ जाल्लो.
https://youtu.be/pqtBaxVKWu4 ह्या लिंकाचेर अमरप्रेम पळोवंक मेळटा.
– डी. महेश
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
