भांगरभूंय | प्रतिनिधी
भारताचो ग्रॅण्डमास्टर अर्जुन एरिगेसीन 28वी अबुधाबी मास्टर्स बुद्दीबळ सर्त जिखली. णववे आनी निमाणे फेरयेंत ताणें स्पेनाच्या डॅव्हीड अांतोन गुईज्जारोक हारयलो. 18 वर्सां पिरायेच्या अर्जुनान 7.5 गुणां सयत वस्तादपण जोडलें.
अर्जुनान सर्तींत एक लेगीत हार घेवंक ना. तो उझ्बेकिस्तानाच्या जावोखीर सिंदारोवा परस फक्त एका गुणान मुखार उरलो. सिंदारोवान ईराणच्या एम अमीन तबाताबाएर्डाक हारोवन दुसरी सुवात मेळयली.
अर्जुनान हालींसाराक बरें प्रदर्शन केलां. हालींच भारतांत जाल्ले चेस ऑलिम्पियाडा उपरांत ताणें 35 ईलो गूण मेळयिल्ले. अर्जुनान अबुधाबी मास्टर्स बुद्दीबळ सर्तींत स डाव जिखले आनी तीन डाव बादाबाद दवरले.
अर्जुनान आपल्याच देशाच्या रोहित कृष्णा, दीप सेनगुप्ता, रौनक सिद्धवानी हांचे खेरीत चीनाच्या वांग हाओ, सर्बियाच्या एलेक्सांद्र इंदजीक आनी गुईजारो हाका हारयलो, जाल्यार रशियेच्या इवजेनी तोमाशेवकी, जॉर्डन वान फोरीस्ट आनी रे राबसन हांकां बरोबरीत आडायले.
भारताचे हेर ग्रॅण्डमास्टर निहाल सरीन, एसपी सेतुरमण, कार्तिकेयन मुरली आनी आर्यन चोपडा तशेंच फिडे मास्टर आदित्य सामंत हांचे समान 6.5 गूण जाले.
नॅदरलॅण्डाच्या जॉर्डन वान फोरीस्ट हाणें तिसरी सुवात मेळयली. ताच्या उपरांत अमेरिकेच्या रे राबसनाक चवथी सुवात फावो जाली.
सरिनाक सवी सुवात फावो जाली. ताच्या उपरांत सेतुरमण, सामंत, कार्तिकेयन, मुरली आनी चोपडा हांणी पयल्या धांनी सुवात मेळयली. भारताचो आनीक एक ग्रॅण्डमास्टर अर्जुन कल्याण 15वे आनी अणभवी बी अधिबान 19वे सुवातेर उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
