भांगरभूंय | प्रतिनिधी
हजरां वयर विद्यार्थी घेतले वांटो
पणजी: ’अंत्रुज घुडयो’, फोंडेंची एक साहित्यीक आनी सांस्कृतीक संस्था. ही संस्था राज्य पांवड्यार शालेय विद्यार्थ्यां खातीर कला-साहित्य आनी सृजनाचो अविश्कार घडोवन हाडपी मेळावो ’भुरग्यांचो कला मेळ’ आयोजीत करता.
गोंयचो हो सगळ्यांत व्हडलो सांस्कृतीक मेळावो 8 जानेवारीक राजीव गांधी कला मंदीर, फोंडें हांगा जातलो. गोंयच्या विंगड विंगड शाळांतल्यान सुमार 1000 वयर विद्यार्थी ह्या मेळाव्याक वांटो घेतले.
अंत्रुज घुडयो फाटलीं कितलींशींच वर्सां जालीं हो मेळावो घडोवन हाडटा. अंदूंचें हें 8वें वर्स.
सुरवातेक तांचो हो मेळावो फोंडे म्हाल मर्यादीतूच आसतालो. पूण फाटल्या 4 वर्सां सावन हो मेळावो राज्य पांवड्यार घडोवन हाडटा.
एका दिसाच्या ह्या सांस्कृतीक मेळ्याव्यांत कलात्मक, भाशीक आनी सादरीकरणाच्या तांकीचो अभ्यास करपी वट्ट 8 सर्ती आसतल्यो. हातुंतल्यान उत्कृश्ठ शाळे खातीर चॅम्पियनशीप आसतली.
नाच नाच नाचुयां (नाच), गाज – लोकगीत गायन सर्त (लोकगीत गायन), तकल-मेकल (प्रस्नमाची सर्त), टिवल्यो बावल्यो (एड-मॅड शो), आयकात आयकात! ( रस्तोनाट्य सर्त), रंगीत पोती (बॅग पेंटींग), काणी काणी कोतवा (कॉमीक स्ट्रीप), सवंग (भेसवण सर्त) अश्या सर्ती ह्या मेळाव्याक जातल्यो.
गोंयच्या सुमार 20 शाळांनी ह्या मेळाव्या खातीर आपलें नांव नोंद केलां. उक्तावण सुवाळो सकाळीं 9.30 वरांचेर सुरू जातलो. मुखेल सोयरे म्हणून वीज मंत्री सुदीन ढवळीकार आनी समाज सेवक केतन भाटीकार मानाचे सोयरे म्हणून मेळाव्याचे उक्तावण कार्यावळीक आसतले.
इनामां वांटपाचो सुवाळो सांजेच्या 4.30 वरांचेर सुरू जातलो. समारोप सुवाळ्या खातीर मुखेल सोयर म्हणून समाज सेवक मिथील ढवळीकार, आंतरराष्ट्रीय बॅडमिंटन खेळगडी अनुरा प्रभुदेसाय भोवमान सोयरी म्हणून हाजीर आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
