भांगरभूंय | प्रतिनिधी
इंडीयन प्रिमीयर लीग 2025 सुरू जावपाक अजून खूब दीस बाकी आसात. पूण, सगल्या पंगडांनी फुडल्या हंगामा खातीर तयारी सुरू केल्या. तयारीचोच एक भाग म्हणून लखनौ सुपर जायण्ट्सान भारताचो आदलो फास्ट बॉलर झहीर खानाक आपलो मॅण्टोर केला.
आयपीएल 2025 पयलीं लखनौ सुपर जायण्ट्सान आपले एक समस्येचें समाधान सोदून काडलें. पूण, मुखेल्याचो प्रस्न अजून कायम आसा. फाटल्या तीन हंगामांनी पंगडाचें फुडारपण लोकेश राहुलान केल्लें. पूण, ताच्या फुडारपणाखाला लखनौक म्हणपा सारकें प्रदर्शन करपाक जमूंक ना. ताकाच लागून फुडल्या हंगामा पयलीं फ्रॅंचायजी नव्या मुखेल्याच्या सोदांत आसा.
दुसरे वटेन फाटल्या हंगामांत मुंबय इंडियन्सान रोहीत शर्माचे सुवातेर हार्दीक पांड्याक मुखेली केल्लो. ह्या निर्णयाचेर रोहीत शर्मा खोशी ना. फाटले आयपीएलांतले एके मॅचीं लखनौचो धनी संजीव गोयंका आनी रोहीत शर्मा हांचे मदीं मैदानांत चर्चा जाल्ली. ते उपरांत फुडल्या हंगामांत रोहीत शर्मा हो लखनौ सुपर जायण्ट्सांत सामील जावपाक शकता अशी चर्चा रंगिल्ली.
रोहीत शर्मा पावणेंत सामील जाता जाल्यार लखनौ फ्रॅंचायजी ताचे खातीर 50 कोटी खर्च करपाक शकता अशी चर्चा सुरू जाल्या, हाचेर संजीव हांणी प्रतिक्रिया दिल्या.
रोहीत शर्मा पावणेंत सामील जातलो हे विशीं कोणांक कितें खबर आसा व्हय. तशेंच मुंबय इंडियन्स ताका मेकळो करतलो काय ना हें लेगीत आमकां खबर ना अशें संजीव हांणी म्हणलां.
रोहीत शर्मा पावणेंत सामील जालो जाल्यारूय एका खेळगड्याचेर सॅलरी कॅप 50 टक्के खर्च करपाक शकना. तशें केलें जाल्यार बाकीच्या 22 खेळगड्यांक कशें सांबाळपाक शकतले असो प्रस्न लेगीत संजीव हांणी केलो.
तशेंच रोहीत शर्माचेर हेर फ्रॅंचायजींची लेगीत नदर आसा. त्यो फ्रॅंचायजी लेगीत रोहीताक आपल्या पंगडांत घेवपाक इत्सूक आसतल्यो अशें संजीव गोयंकान मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
