भांगरभूंय | प्रतिनिधी
भारताच्या क्रिकेट पंगडाचो आदलो फास्ट बॉलर झहीर खान आयपीएलाची फ्रॅंचायजी लखनौ सुपर जायण्ट्सांत सामील जालो. 2022त आयपीएलांत पदार्पण करपी लखनौ सुपर जायण्ट्सान झहीर खानाक आपलो नवो मॅण्टोर केला. 45 वर्सां पिरायेचो झहीर खान 2000 ते 2014 मेरेन भारताच्या राष्ट्रीय पंगडाचो वांगडी आशिल्लो.
2022 आनी 2023चे आयपीएलांत गौतम गंभीर लखनौ सुपर जायण्ट्साचो मॅण्टोर आशिल्लो. 2024त ताणें लखनौ सुपर जायण्ट्स सोडून कोलकाता नायट रायडर्सांत सामील जाल्लो. तेन्ना सावन लखनौच्या मॅण्टोराची सुवात रिती आशिल्ली.
लखनौ सुपर जायण्ट्सान 2022 आनी 2023च्या हंगामाच्या प्ले ऑफांत सुवात मेळयिल्ली. पूण, फाटल्या हंगामांत ताका पयल्या चारांनी सुवात मेळूंक नाशिल्ली. झहीर खानाच्या मार्गदर्शनाखाला लखनौ सुपर जायण्ट्स किताब जिखपाक इत्सूक आसतलो.
झहीर खान 2018 ते 2022 मेरेन मुंबय इंडियन्सांत आशिल्लो. पयलीं क्रिकेट संचालक आनी उपरांत ग्लोबल डॅव्हलपमॅण्टाचो मुखेली आशिल्लो. ताचे पयलीं एक खेळगडो म्हणून ताणें मुंबय इंडियन्स, रॉयल चॅलेंजर्स बंगळुरू आनी दिल्ली डॅरडॅविल्सा वतीन खेळिल्लो. ताणें 10 हंगामांनी तीन पंगडां वतीन 100 मॅचींनी खेळ्ळा. हातूंत 7.58चे इकॉनोमीन 102 विकेटी घेतल्यात. 2017तले आयपीएलांत तो निमाणे खेपे खेळिल्लो.
लखनौ सुपर जायण्ट्सान 2022त आयपीएलांत पदार्पण केल्लें. आपल्या पयल्याच हंगामांत खेळटना ताणें प्ले ऑफा मेरेन मजल मारिल्ली. पूण, अॅलिमिनेटरांत ताका हार घेवची पडिल्ली. ते उपरांत 2023त ताणें परतून प्ले ऑफांत सुवात मेळयिल्ली. त्या वेळार लेगीत ताका अॅलिमिनेटरांत हार घेवची पडिल्ली. अंदूं ताका गुणतकट्यांत सातवे सुवातेर समाधान मानचें पडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
