भांगरभूंय | प्रतिनिधी
नावेली स्पोर्टींग क्लबाक 3-1 अशा गोल फरकांनी हारोवन कुडचडेंच्या गार्डीयन अॅंजेल स्पोर्ट्स क्लबान काणा-बाणावली स्पोर्ट्स असोसिएशनान आयोजीत केल्ली काणा-बाणावली करंड आंतरगांव फुटबॉल सर्त जिखली. दांडो फुटबॉल मैदानाचेर सर्तीचें आयोजन केल्लें.
मध्यांतरा मेरेन दोनूय क्लब 1-1 अशे बरोबरींत आशिल्ले. मॅचीच्या 15व्या मिनटाक जैसन डायसान गार्डीयन अॅंजेलाक गोल करून आघाडी मेळोवन दिली. जाल्यार 29व्या मिनटाक रोनाल्डो परेरान पॅनल्टीचेर गोल करून नावेली स्पोर्ट्स क्लबाक 1-1 असो बरोबरींत हाडलो.
दुसऱ्या अर्दांत प्रॅस्टन कास्ताना आनी गॉडवीन फर्नांडीस हाणें फाटोफाटो गोल करून गार्डीनय अॅंजेलाक वस्तादपण मेळोवन दिवपाक हातभार लायलो.
ह्या जैतान गार्डीयन अॅंजेलाक रोख 60 हजाराचें इनाम आनी करंड फावो जालो, जाल्यार उप वस्ताद नावेली क्लबाक 50 हजार आनी करंड भेटयलो.
गार्डीयन अॅंजेलाच्या सिरील डायस, जैसन डायस, बेंजू क्लेमेंत, रसेल फर्नांडीस आनी गॉडवीन फर्नांडीस, नावेली क्लबाच्या रोनाल्डो परेरा आनी काणकोण स्पोर्ट्स अॅण्ड कल्चर क्लबाच्या टॅरेस लोबो हाका वैयक्तीक इनाम फावो जालें.
इनामां भेटवण सुवाळ्याक खासदार कॅप्टन विरियातो फर्नांडीस मुखेल सोयर म्हणून उपस्थीत आशिल्ले. तशेंच आमदार वेंझी व्हिएगस लेगीत हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
