भांगरभूंय | प्रतिनिधी
येजमान इंग्लंडान मॅन्चॅस्टरांत श्रीलंका पंगडा आड चालू आशिल्ले पयले टॅस्टीच्या तिसऱ्या दिसा आपल्या पयल्या डावांत सगल्यो विकेटी व्हगडावन 358 धांवड्यो केल्यो. विकेटकीपर बॅट्समन जॅमी स्मिथान कारकिर्दींतलो पयलो शेंकडो नोंदयलो. ताच्याच शेंकड्या नेटार इंग्लंडान पयल्या डावांत 112 धांवड्यांची म्हत्वाची आघाडी घेतली. श्रीलंकेन पयल्या डावांत 236 धांवड्यो केल्ल्यो. निमाणी म्हायती मेळिल्ली त्या वेळार श्रीलंकेन आपल्या दुसऱ्या डावांत 4 विकेटी व्हगडावन 169 धांवड्यो केल्ल्यो.
इंग्लंडान तिसऱ्या दिसाची सुरवात 6 बाद 259 धांवड्यां वयल्यान केली. त्या वेळार जॅमी स्मिथ 72 धांवड्यांचेर आशिल्लो. ताणें एक बाजू सांबाळून आपल्या पंगडाक तिनशेंच्या वयर व्हेलो. पूण, शेंकडो पुर्ण केल्या उपरांत तो रोखडोच बाद जालो. ताणें 111 धांवड्यांचें योगदान दिलें. श्रीलंके वतीन असिथ फर्नांडोन 4 आनी प्रभात जयसुर्यान 3 विकेटी घेतल्यो. विश्व फर्नांडोन दोन आनी मिलन रत्नायकेन एक विकेट घेतली.
श्रीलंकेन टॉस जिखून पयलीं बॅटींग करपाचो निर्णय घेतिल्लो. पूण, ताका व्हड धांवसंख्या उबारपाक शक्य जालें ना. मुखेली धनंजय डि सिल्वान 74 आनी मिलन रत्नायकेन 72 धांवड्यांची खेळी करून आपल्या पंगडाक समाधानकारक स्कोर उबारून दिवपाक मजत केली. श्रीलंकेक फकत 74 ओव्हरीच खेळप शक्य जालें.
इंग्लंडा वतीन शोएब बशीर आनी क्रिस वोक्सान देरीक तीन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
