भांगरभूंय | प्रतिनिधी
भारताच्या हॉकी पंगडान ऑलिम्पीक सर्तींत बळिश्ट ऑस्ट्रेलिया पंगडाक 3-2 अशा गोल फरकांनी हारयलो. 1972 उपरांत म्हणल्यार 52 वर्सांनी भारतान पयलेच खेपे ऑस्ट्रेलिया पंगडाक ऑलिम्पिकांत हारयलो. हरमनप्रीत सिंगाच्या दोन गोलांच्या नेटार भारतान ब गटांतले आपले निमाणे सांखळी मॅचींत हें जैत जोडलें. ह्या जैतान भारत ब गटांत दुसरे सुवातेर पावलो. ताचे पांच मॅचींतल्यान 10 गूण जाले. पयले सुवातेर बॅल्जियम आसा. ऑस्ट्रेलिया पंगडाचे पांच मॅचींतल्यान 9 गूण आसात आनी तो तिसरे सुवातेर आसा.
पी आर श्रीजेश हो संवसारांतल्या उत्कृश्ट गोलकीपरांतलो एक कित्याक आसा हें ताणें काल परतून एकदा सिद्ध केलें.
मुखेली हरमनप्रीत सिंग हाणें दोन जाल्यार अभिषेकान एक गोल केलो. गट पांवड्या वयल्यो सगल्यो मॅची पुर्ण जाल्या उपरांत भारत क्वॉर्टरफायनलींत खंयच्या पंगडा आड खेळटलो हें निश्चीत जातलें.
ऑलिम्पिकाच्या इतिहासांत ह्या पंगडां मदीं अजून मेरेन 11 मॅची जाल्यात. भारताक हातूंतल्यो फकत 3 मॅची जिखपाक येस आयिल्लें.काल जिखिल्ली चवथी मॅच थारली. 1960तले रोम ऑलिम्पिकाचे क्वॉर्टरफायनलींत, 1964 टोकियो ऑलिम्पिकाचे सेमी फायनलींत आनी 1972 म्युनीक ऑलिम्पिकांत गट पांवड्याचेर जैत जोडिल्लें. दुसरे वटेन ऑस्ट्रेलिया पंगडान स मॅची जिखल्यात, जाल्यार दोन मॅची बादाबाद उरल्यात.
मजगतीं, भारतान आक्रमक सुरवात केली. ताणें तीन मिनटां भितर दोन खेपे प्रतिस्पर्धी पंगडाच्या डी वाठारांत प्रवेश केलो. पूण, ताका गोल करपाक येस मेळूंक ना. ऑस्ट्रेलियेन लेगीत प्रतिहल्लो केलो. 10व्या मिनटाक ऑस्ट्रेलियेक पॅनल्टी कॉर्नर मेळ्ळो. पूण, भारतान गोल जावपाक दिलो ना.
भारतान पयल्या क्वॉर्टराच्या 12व्या मिनटाक गोल केलो. मॅचींतलो हो पयलो गोल थारलो. अभिषेकान ललिताच्या शॉर्टाचेर रिबावण्डाचेर हो गोल केलो. एका मिनटा उपरांत भारतान आनीक एक गोल केलो. सुरजीत आनी गुरजंत हांणी भारताक पॅनल्टी कॉर्नर मेळोवन दिलो. हाचेर मुखेली हरमनप्रीत सिंगान गोल केलो.
दोन गोलांनी फाटीं पडून लेगीत ऑस्ट्रेलियेन हार मानूंक ना. दुसऱ्या क्वॉर्टराचे सुरवातीक भारताच्या विवेकाक ग्रीन कार्ड मेळ्ळें. ताका लागून विवेकाक पांच मिनटां मेरेन मैदाना भायर रावचें पडलें. हे मजगतीं, ऑस्ट्रेलियेन 19व्या मिनटाक पॅनल्टी कॉर्नर मेळयलो. पूण, तांकां गोल करपाक जमूंक ना. ऑस्ट्रेलियेन 25व्या मिनटाक गोल करपाक येस आयलें. थॉमस क्रेगान गोल करून भारताची आघाडी उणी केली. दुसरें क्वॉर्टर सोंप मेरेन भारत 2-1 असो मुखार आशिल्लो.
तिसऱ्या क्वॉर्टराची सुरवात जलद जाली. हरमनप्रीतान मारिल्लो शॉर्ट ऑस्ट्रेलियेच्या डिफॅण्डराच्या पांयाक लागलो आनी भारताक पॅनल्टी स्ट्रोक मेळ्ळो. हरमनप्रीतान गोल करून भारताचो स्कोर 3-1 असो केलो. हरमनप्रीताचो हो सर्तींतलो सवो गोल थारलो.
चवथ्या क्वॉर्टरांत ऑस्ट्रेलियेन आपलो दुसरो गोल केलो. तांणी हो गोल पॅनल्टी स्ट्रोकाचेर केलो. ते उपरांत ऑस्ट्रेलियेन बरोबरी करपाचो खूब यत्न केलो. पूण, भारतान आनीक गोल जावपाक दिलो ना आनी 3-2 अशा फरकान जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
