भांगरभूंय | प्रतिनिधी
उल्हास नायकः सुरश्री केसरबाय केरकार विद्यालयांत गुरुपुनव
भांगरभूंय । खबरां मेज
पणजीः गुरू कडल्यान शिकवण घेवन खूब व्हड जायात. गुरुआड झुंजपाचे यत्न केन्ना करूं नाकात. कारण गुरु हो आमच्या जिविताची बुन्याद आसा. आमचे जिणेंत सदगुणांचो, सद्विचारांचो, सुसंस्कारांचो प्रवाह तांचे वरवींच जाता. तो आमचें चारित्र्य घडयता. आमकां गिन्यानाच्या गाभाऱ्यांत व्हरुन सोडटा आनी आमचे जिणेक उजू मार्ग दाखयता, अशें बाल साहित्यकार आनी नाटककार उल्हास यशवंत नायक हांणी सांगलें. केरी फोंडेंच्या सुरश्री केसरबाय केरकार विद्यालयांत घडोवन हाडिल्ले गुरुपुनवेचे कार्यावळींत मुखेल सोयरे ह्या नात्यान ते उलयताले.
कार्यावळीची सुरवात विद्यार्थ्यांच्या येवकारगितान जाली. मुख्याध्यापिका उषा बाला नायक हांणी गुरुपुनवेचें म्हत्व सांगून येवकार दिलो.
मुखेल सोयरे उल्हास नायक, मुख्याध्यापिका उषा नायक आनी ज्येश्ठ शिक्षिका नारायणी तेंडुलकार हांणी तुळशी वृंदावनाच्या रोपाक उदक ओंपून महर्षी व्यासमुनींच्या फोटवांक फुलां हार अर्पण केलो. प्रणाली नायक, संघर्षा सतरकार आनी देवयानी गावडे हांणी वेदी वयल्या मानेस्तांक फुलां भेटयलीं.
बी.एड. प्रशिक्षणार्थी नितिलेश, सिया आनी दिक्षिखा तशेंच शिक्षिका सप्तला नायक, तेजस्विनी बर्वे हांच्या मार्गदर्शनाखाला विद्यार्थ्यांनी गुरुपुनवेचेर आदारीत सांस्कृतीक कार्यावळ सादर केली. तांकां संगिताचेर किशोर पालकार, विध्येश च्यारी आनी कविता गावडे हांचीं साथ लाभली. गुरुपुनवे निमतान घेतिल्ले सर्तींतल्या जैतवंतांक मानेस्तांचे हस्तुकीं इनामां भेटयलीं. कार्यावळींचें सुत्रसंचालन काव्या सुरज नायक हांणी केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
