हरवळेंच्या रुद्रेश्वराक शिवरात्री दिसा भाविकांक अभिशेक करपाची वेवस्था

भांगरभूंय | प्रतिनिधी

भांगरभूंय । प्रतिनिधी
साखळीः हरवळें- साखळी हांगच्या रुद्रेश्वर देवस्थानांत महाशिवरात्री निमतान  शुक्रार  8 मार्चाक भाविकांक आपल्या हातांत देव रुद्रेश्वराक अभिशेक करपाची वेवस्था केल्या. बिरेस्तार आनी शुक्रार अशे दोन दीस व्हो उत्सव जातलो अशी म्हायती देवस्थान समितीचो अध्यक्ष यशवंत माडकार हाणे एके पत्रकार परिशदेंत दिली. ह्या वेळार समितीचे पदाधिाकरी सुभाष किनळकार, उपेंद्र गांवकार, संगेश कुंडयकार, काशिनाथ मयेकार हाजीर आशिल्ले.
बिरेस्तार 7 मार्चाक  सकाळीं 10 वरांचेर यशवंत माडकार हाचे हस्तुकीं प्राकार शुद्धी होम, दनपारां 1.30 वरांचेर तीर्थ प्रसाद, सांजे 8.30 सावन भजन आनी उपरांत देवाची पालखी मिरवणूक जातली. रातयां 12 वरांचेर आजोबा महिला दशावतारी नाट्य मंडळ, केरी- सत्तरी हांच्या शीव- पार्वती युद्ध हे पुराणीक नाटकाचो प्रयोग जातलो.
शुक्रार 8  मार्चक फातोडेर 3.30 वरांचेर मुक्तद्वार म्हापर्वणेक सुरवात जातली. देवस्थानाचो अध्यक्ष यशवंत माडकार हाचे हस्तुकीं सगल्यांत पयलीं अभिशेक जातलो. उपरांत 4 वरां सावन भाविकां वतीन श्रीच्या लिंगाचेर आपल्या हातांनी रुद्राभिशेकाक सुरवात जातली. सकाळीं 8 वरां सावन फराळ, दनपारां 12.30 वरां सावन म्हानैवेद्याक सुरवात जातली. अभिशेक सांजे 7.45 मेरेन करपाक मेळटलो. रातयां 9 तें 12 मेरेन थळाव्या कलाकारांची भजनाची कार्यावळ जातली.
12 वरां उपरांत म्हाआरती आनी देवाची दिंडी पंगडा सयत पालखी मिरवणूक जातली.  वरचें हरवळें हांगच्या केळबाई  देवीचें आगमन जातलें. उपरांत झरीवाडो विठ्ठलापूर साखळी हांगच्या पांडुरंग प्रासादीक नाट्य मंडळा वतीन पुंडलीक नायक हाच्या दिश्ठ दौलत ह्या कोंकणी नाटकाचो प्रयोग जातलो.
9 मार्चाक सकाळीं 6 वरांचेर दिवजोत्सव जाल्या उपरांत विजयरथांतल्यन देवाची मिरवणूक काडटले. सकाळीं 10 वरांचेर विनोद कमलाकर भंडारी हाचे येजमानके खाला देवस्थाना वतीन अर्चशुद्धीक सुरवात आनी दनपारां 1.45 वरांचरे म्हाआरत्यो आनी म्हाप्रसाद जातलो. भाविकांनी व्हडा संख्येन महाशिवरात्री उत्सवाक येवचें अशें देवस्थान समितीन मागलां.