भांगरभूंय | प्रतिनिधी
गोंयची फुडली विधानसभा वेंचणूक नियोजीत वेळा परस तीन चार म्हयने आदीं म्हणल्यार नोव्हेंबर वा जानेवारींत जावपाची शक्यताय उक्तायतात. हे शक्यतायेक लागून राज्यांतलें राजकी वातावरण ल्हवू ल्हवू पूण निश्चीतपणान तापूंक लागलां. पावस आतां केन्नाय सुरू जावपाचो आशिल्ल्यान तापपी वातावरण कितले मेरेन तापतूंच उरतलें हाचो दुबाव आसा. कोणे ‘विजय यात्रे’ खातीर अनंत चतुर्दशीचो म्हूर्त काडला, जाल्यार कोण ‘राखण’ यात्रा केन्ना सुरू करची हे खातीर म्हूर्त सोदीत आसा. ह्या यात्रांनी अजून दोन वा तीन यात्रांची भर पावस सोंप मेरन वा गणपतीच्या शुभआगमना मेरेन भर पडली जाल्यार ताचेंय अजाप दिसपाचें कारण ना. तान लागले उपरांत बांय खणप हो प्रकार नेमको कितें आसता हें समजून घेवपाचें आसत जाल्यार गोंयांतल्या सगल्या विरोधी पक्षांच्या फुडाऱ्यां कडल्यान शिकूंक मेळटलें. ताका आडवाद असो कोणूच ना. आमचे सामकें तडफदार फुडारी विजय सरदेसाय हेवूय तातूंत मोडटात. पयर आपल्या वाडदिसा निमतान तांणी जें तडफदार भाशण केलें तें आयकल्लें आसत जाल्यार तांच्या तळमळीची प्रचिती कोणाकूय येवची. गोंयांत सत्ता बदल घडोवन हाडपा खातीर तांणी हे खेपे केल्लो ‘पण’ पळयत जाल्यार सरकारा आड हेर राजकी पक्षांच्या फुडाऱ्यांनीय ताचो धसको घेतला आसतलो. विजय सरदेसाय हांणी सरकार पक्षांच्या वा सरकारा आड आवाज काडपाचे आतां मेरेन तशें कांयच शिल्लक दवरूंक नासलें तरी तांकां तसो सांगात मेळना ही वस्तुस्थिती आसा, आनी ताचे फाटलीं कारणां तांकांच सोदचीं पडटलीं.
विधानसभा वेंचणूक लागीं आयिल्ल्यान सगल्यांकूच सत्तेचीं तान लागप सभाविकूच आसा, आनी तान लागले उपरांत बांय खणप ही जाल्यार सगल्यांची सेगीतची प्रवृत्ती. विजय सरदेसाय आसूं वा गिरीश चोडणकार वा हेर पक्षांचे फुडारी ताका आडवाद नात. आडवाद आसा तो फक्त भाजपाचो आनी तोवूय एक सुसंघटीत राजकी पक्ष ह्या नात्यान. विधानसभा वेंचणूक लागीं आयिल्ल्यान आतां धांवपळ कशी चल्ल्या तें काँग्रेस, गोवा फॉरवर्ड, आम आदमी, आरजीपी अश्या सगल्याच विरोधी पक्षांच्या तंबूंनी एक नदर मारल्यार ताची कल्पना येता. तंबूच म्हणचे पडटले ते. सुमार सगल्याच विरोधी राजकी पक्षांचेर आयज भारतीय जनता पक्षान तंबूंत रावपाची वेळ हाडल्या, आनी ताका काँग्रेस पक्षूय, जाणें देशाचेर स- सात दसकां राज्य केलें. प्रादेशीक पक्षांचें अस्तित्व जाल्यार सोंपपाच्या मार्गार बी ना न्हय अशीच कितेंशी आयची अवस्था जाल्या. बंगालांत ममताची जाल्ली हार जाल्यार पळोवं नजं. अशे फाटभुंयेर पयर विजय सरदेसाय हांणी आपल्या वाडदिसा निमतान फोडिल्ली डरकाळी अशा पक्षांक थाकाय दिवपी निश्चितूच आसा. पूण आतां पुरायपणान शिंपडिल्ल्या विरोधी पक्षांक एकठांय हाडून ‘शक्तिमान’ भाजपा कडेन दोन हात करपाचे त्राण आपले मदीं आसा काय कितें हाचो तांणी विचार केला बी काय हाची जाप मात सोदची पडटली. विजय सरदेसाय म्हणटात तेप्रमाण ही प्रक्रिया खूब आदीं सावन जावंक जाय आशिल्ली. काँग्रेसीच्या प्रदेश फुडारपणांत ऐनवेळार बदल जाल्ल्यान विजय सरदेसाय हांणी बांदिल्ले काय आडाखे चुकले बी आसुये अशें कांय राजकी निरिक्षकांक दिसता.
काँग्रेस प्रदेशाध्यक्ष अमीत पाटकार हांची गच्छंती तशी अनपेक्षितूच आशिल्ली. पूण कित्याक कोण जाणां आमचे सारक्यांक मात दिसतालें की गिरीश चोडणकार ही संद सोडचे नात. वेंचणुके वेळार तातूंतय विधानसभेच्या, प्रदेश अध्यक्षपद मेळपाचे खूबशे लाव आसतात आनी ताचेर उदक न सोडपाचो धूर्तपणा तांचे कडेन नाशिल्लो अशें उपरांत कोणेय म्हणचें न्हय हे खातीर तांणी तें स्विकारलें आसुये अशें सर्वसामान्यांक दिसूंक शकता. पूण आयज प्रदेश संघटणेंत जी फूट पडिल्ली दिसून येता ताची तांणी कल्पना केल्ली नासुये, वा अदमास तांकां नासुये हें पटना. गिरीश चोडणकार हें एक वेगळेंच रसायन आसा. पूण तेवूय एक सपन बाळगून आसात. सपनां पळोवप हें चुकीचें आसा अशें हांव म्हणचो ना. पूण ते खातीर पयलीं पक्षा खातीर, संघटणेच्या पुराय बांदणे खातीर योगदान जर दिल्लें जाल्यार घडये तांकां आयज कोणूच आडमेळीं हाडपाचो प्रस्नूच उप्रासचो नाशिल्लो. प्रदेशाध्यक्षपदार जाल्ले आपले नेमणुकेची स्वताकूच कल्पना नाशिल्ली हें तांचें सांगप कोणाकूच पटपा सारकें ना. खासदारा सयत ती कोणाकूच नासुये हाचेंय अजाप दिसता. पूण एखादें ‘लक्ष्य’ दोळ्यां मुखार दवरून तांणी हें पद मेळयिल्लें आसत वा ते गोंयांत आयले आसत जाल्यार तांकां व्यापक हीत दोळ्यां मुखार दवरुनच कार्य मुखार व्हरचें पडटलें. विजय सरदेसाय हांचे सारको अभ्यासू, तडफदार फुडारी काँग्रेस पक्षा कडेन हात मेळोवपाक तयार आसतना दुसरोच कसलो तरी विचार करून तांकां पयस दवरपा खातीर भर दिल्लो आसत जाल्यार ती काँग्रेसीची मोटी चूक आशिल्ली आनी आतां ती सुदारले उपरांतूय कितेंय फरक पडटलो अशी दिसपा सारकी परिस्थिती ना.
आम आदमी पार्टी आनी गोवा रिव्हॉल्युशनरी पार्टी ह्या दोन विरोधी पक्षां विशीं आयज तरी कितेंय विशेश बरोवपा सारकें ना. आम आदमीन फाटले वेंचणुकेंत दोन सुवातो जिखून आपलें अस्तित्व सिद्ध केल्लें. पूण उपरांत पक्षाची वाड अपेक्षीत गतीन जाल्ली दिसून येना. दिल्ली आनी पंजाबांतल्या राजकी घडामोडींक लागून गोंयांतल्या संघटणात्मक विस्ताराचेर मर्यादा आयिल्ल्याचें जाणवता. पक्ष कांय मतदारसंघांनी सक्रीय आसलो तरी राज्यव्यापी पर्याय म्हूण स्वताची प्रतिमा निर्माण करपाक तांकां अजून येस आयिल्लें ना. आरजीपी हो पक्ष एक पर्याय म्हूण फाटले वेंचणुकेंत मुखार आयिल्लो आनी आमदार विरेश बोरकार हांणी तर विधानसभेंत ह्या पक्षाक व्हड राजकी फुडार आशिल्ल्याचें आपले कामगिरीन दाखोवन दिलें. पूण हो पक्षूय फुटीच्या मार्गार वचत आशिल्ल्याचें दिसून येता. वेंचणुकेंत व्यापक प्रभाव निर्माण करपा खातीर गरजेची आशिल्ली संघटणात्मक शक्त तांचे कडेन अजून दिसून येता. कांय मतदारसंघांनी ते निकालाचेर परिणाम करूंक शकतात इतलेंच. अशे फाटभुंयेर पांच- स म्हयन्यांचेर येवन राविल्ले वेंचणुकेंत सत्ताधारी पक्षां मुखार हे पक्ष आव्हान कशे उबे करतले हो मोटो प्रस्न आसा. भारतीय जनता पक्ष सोडीत जाल्यार हेर खंयच्याच पक्षान वेंचणुकेचे नदरेन ठोस आनी व्यापक तयारी सुरू केल्ल्याचें चित्र अजून तरी दिसून येना. विरोधकां मदीं समन्वयाचो उणाव, फुडारपणाचो प्रस्न आनी संघटणात्मक कमकुवतपणा हाका लागून येता ते वेंचणुकेंत भाजपच जिखतलो अशें आयचें चित्र आसा. विजय सरदेसाय हांणी एकल्यानूच ‘शिवधोनू’ उबारपाची ‘भिष्मप्रतिज्ञा’ करून बसल्यात. ‘ऑपरेशन विजय’चें ‘विजय ऑपरेशन’ जायना जाल्यार पुरो. वेंचणूक चुरशीची करपाक विरोधक येसस्वी थारत जाल्यार तांणी अर्दें झूज जिखिल्ल्याचें म्हणूंक येतलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
