भांगरभूंय | प्रतिनिधी
न्यूयॉर्क, खबरां संस्थाः दोन भारतीय पत्रकारांनी आंतरराष्ट्रीय मळार परतून एक फावट आपली वळख निर्माण केल्या. आनंद आरके आनी सुपर्णा शर्मा हांकां सायबर गुन्यांव उक्तो करपी म्हत्वाच्या सोद पत्रकारिते खातीर प्रतिश्ठीत ‘पुलित्झर’ पुरस्कार फावो जाला. तांकां हो पुरस्कार नताली ओबिको पियर्सन वांगडा इलस्ट्रेटेड रिपोर्टिंग आनी कमेंट्री विभागांत फावो जालो. ‘पत्रकारितेचे नोबेल’ ह्या नांवान वळखपी हो पुरस्कार तांकां ब्लूमबर्गा खातीर केल्ल्या ‘ट्रॅप्ड’ ह्या खाशेल्या अहवाला खातीर मेळ्ळो.
ह्या पत्रकार जोडप्यान तयार केल्लो ‘ट्रॅप्ड’ हो अहवाल लखनौची न्यूरोलॉजिस्ट रुचिरा टंडन हिचे बरोबर घडिल्ली खरी घडणूक ‘डिजिटल अटक’ हे भिरांकूळ यंत्रणेक उक्ती करता. आनंदाचे प्रभावी चित्रण आनी सुपर्णाचे खोलायेन केल्ले पत्रकारितेचें हें खाशेलें मिश्रण सायबर गुन्यांवकार तंत्रगिन्यानाचो वापर कसो करता आनी मानसीक नदरेन फटवणूक कशी करता तें दाखयता.
आनंदाक आयजनर पुरस्कारुय फावो
मुंबय रावपी आनंद हो इलस्ट्रेटर आनी व्हिज्युअल आर्टिस्ट आसा. तशेंच इमेज कॉमिक्सान उजवाडाक आयिल्ले ‘ब्लू इन ग्रीन’ हे ग्राफिक कादंबरी खातीर ताणें 2021 वर्सा कलरिस्ट जॉन पायरसन वांगडा ‘बेस्ट पेंटर/मल्टीमीडिया आर्टिस्ट’ खातीर आयझनर पुरस्कार जिखिल्लो.
सुपर्णा हांणी केअर सेंटरांतलो निष्काळजीपणा उक्ताडार हाडलो
सुपर्णा ही एक फ्रीलान्स सोद पत्रकार आनी संपादक आसा. गुन्यांव, संघर्श, आपत्ती आनी भ्रश्टाचार हांचे विशीं रिपोर्टिंगाचो तिका तीन दशकांचो अणभव आसा. 2023 वर्सा अल जझीरा खातीर दिल्लींतल्या एका केअर फॅसिलिटींत लागिल्ल्या भिरांकूळ उज्या विशीं तिणें केल्ल्या चवकशेंत जाण्ट्यांची जतनाय घेवपाच्या क्षेत्रांत दुर्लक्ष आनी सत लिवपाचो यत्न केल्ल्याचो आरोप उक्ताडार आयलो.
भारतीय वंशाचे अनिरुद्धय विजेतो
हनोई हांगा रावपी भारतीय वंशाचे पत्रकार अनिरुद्ध घोशाल हांणीय आंतरराश्ट्रीय रिपोर्टिंग विभागांत पुलित्झर पुरस्कार जिखलो. असोसिएटेड प्रेस (एपी) कडेन संबंदीत आशिल्लो अनिरुद्ध हांचो अहवाल अमेरिकेच्या बॉर्डर पोट्रोलान सिलिकॉन व्हॅली आनी चीनांत तयार केल्ल्या पळोवणी उपकरणांचेर आदारीत आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
