भांगरभूंय | प्रतिनिधी
नवी दिल्ली: राजस्थानाच्या वायव्य भागांत चक्रीवादळ तयार जाल्ल्यान देशाच्या व्हडल्या भागांत हवामान बदल्लां. आग्नेय उत्तर प्रदेश पसून तामिळनाडू मेरेन ढगांचो लांब पट्टो (ट्रफ) तयार जाला, हाका लागून उत्तर, मध्य आनी दक्षीण भारतांत पावसाचो परिणाम दिसून येता.
फाटल्या २४ वरांत बिहार, हरियाणा, उत्तर प्रदेश, उत्तराखंड आनी ईशान्ये कडल्या राज्यांनी वादळ वार्या सयत नेटान पावस झडला. सोमारा राजस्थानांत वादळ, पावस आनी गारपिटीक लागून एका दिसांत तापमानांत ८ ड्रिगी सेल्सीयस उणाव जाला. जयपुरा सयत खुबश्या शारांचें कमीत कमी तापमान ३५ ड्रिगी सेल्सीयस परस उणे आसतलें.
मध्य प्रदेशांत मे म्हयन्यांत खर उश्णतायेच्या जाग्यार पावस आनी वादळाचो परिणाग दिसता. सोमारा १५ जिल्ह्यांनी पावस आनी गारपीट जाले. बिहाराक वादळी पावस आनी वीज कोसळिल्ल्या ६ जिल्ह्यांनी २० परस चड लोकांक मरण आयलां. हरियाणांत नेटान आयिल्ल्या वादळाक लागून १५ परस चड झाडा हुमटून पडल्यांत.
हिमाचल प्रदेशांतल्या सोलनचें तापमान सोमारा ४.८ ड्रिगी सेल्सीयस आशिल्लें. मे म्हयन्यांतलें हें आतां मेरेनचें सगल्यांत उणें तापमान.१४ मे २०२१ दिसा ९.४ ड्रिगी सेल्सीयस तापमान आशिल्लें. ताबोचें तापमान ३.५ ड्रिगी सेल्सीयस आनी कुकुमसैरीचें ४.१ ड्रिगी सेल्सीयस आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
