भांगरभूंय | प्रतिनिधी
मुख्यमंत्री : 7 नोव्हेंबराक एकाच वेळार गिताचें देशभर गायन
भांगरभूंय । प्रतिनिधी
दिवचल : वंदे मातरम् हें राष्ट्रीय गीत आयज लेगीत आंगांत स्फूर्त आनी देशभक्तीचो संचार घडोवपी गीत आसा. ह्या गिताचें म्हत्व आयचे तरणे पिळगेन समजुचें, तांच्या तोंडार बसपा खातीर विशेश यत्न गरजेचे आसात. अंदूं वंदे मातरम ह्या गिताक 150 पुराय जातात. 7 नोव्हेंबराक प्रधानमंत्री नरेंद्र मोदी हांणी मारिल्ल्या उल्या प्रमाण गोंयांतलीं सगलीं सरकारी कार्यालयां, शाळा, हायस्कूल, उच्च माध्यमीक विद्यालयां तशेंच भौशीक सुवातांचेर वंदे मातरम् हें गीत सकाळीं 10 वरांचेर एकाच वेळार देशांत आनी गोंयांत लेगीत गातले आनी वाजयतले. तातूंत सगल्यांनी वांटो घेवचो. आयज देशा खातीर कोणेच बलिदान दिवपाची गरज ना, जाल्यार देशा खातीर जियेतना विकसीत भारताक योगदान दिवपाची गरज आसा, अशें मुख्यमंत्री डॉ. प्रमोद सावंत हांणी सांगलें.
सांखळी रवींद्र भवनांत आयोजीत संगीत ‘आनंदमठ’ ह्या नाटकाच्या उक्तावण सुवाळ्यांत मुख्यमंत्री उलयताले. ह्या वेळार माचयेर सभापती डॉ. गणेश गांवकार, भाजप प्रदेशाध्यक्ष दामू नायक, सांखळी रवींद्र भवनचे उपाध्यक्ष दत्ताराम चिमुलकार, वल्लभ केळकार, नाटकाचे दिग्दर्शक रवींद्र सातपुते, भाजप उत्तर गोंय अध्यक्ष दयानंद कारबोटकार आनी हेर मानेस्त हाजीर आशिल्ले.
वंदे मातरम् ह्या गितांत देशा खातीर जगपाची आनी बलिदान दिवपाची स्फूर्त मेळटा. ह्याच गितांतल्यान देश स्वतंत्र करपाची प्रेरणा जागी जाली आनी सगल्लयाक देशभावना जागृत जाली, अशेंय मुख्यमंत्री डॉ. सावंत हांणी सांगलें.
वंदे मातरम् उतरां आयतात तेन्ना आंगार कांटो येता. तातूंत एक वेगळीच स्फूर्त आसा. ह्या इतिहासीक उतराक 150 वर्सां पुराय जातात. 7 नोव्हेंबर 1875 ह्या दिसा पं. बंकीमचंद्र चट्टोपाध्याय हांणी हें गीत बरयिल्लें. 1896 त रवींद्रनाथ टागोर हांणी ह्या गिताक चाल लावन गायलें. तेन्नाच्यान हें गीत सगल्यांच्याच तोंडार आसा. भारताच्या इतिहासाच्या संदर्भांत गिताचो मोलाचो वांटो आसा. 1950 त ह्या गिताक डॉ. राजीव प्रसाद हांणी राजमान्यताय दिली. तेन्नाच्यान हें गीत फक्त एक गीत उरनासतना तें देशाच्या स्वातंत्र्यांत एक होमखण जालें. खूबश्या स्वातंत्र्य सैनिकांनी ह्या गिताचे स्फुर्तीन देशा खातीर लढो खर करून आपल्या जिवाची आहुती लेगीत दिली, अशें भाजप प्रदेशाध्यक्ष दामू नायक हांणी सांगलें.
काँग्रेसीक ह्या गितांक कांयच बरें दिसूंक ना. 1923 त काँग्रेस कार्यकारी समितीचे अध्यक्ष मौलाना हांणी हें गीत इस्लाम धर्मा आड आशिल्ल्याचें सांगून अपप्रचार केलो. देशविरोधी आशिल्ल्याचें सांगून 1937 त ह्या गिताचेर बंदी हाडचे खातीर यत्न केले. 2022- 23 त लेगीत ओवेसी हांणीय हें गीत इस्लाम तशेंच देश विरोधी आशिल्ल्याचें सांगून ह्या गिताक विरोध केलो, पूण वंदे मातरम् हें देशाचें प्रेरणा दिवपी गीत आसा. ह्या गितानूच आमकां स्वातंत्र्य मेळोवन दिलें. ह्या गिताचो एक बरो परिणाम आमचे कुडीचेर, मनाचेर, मानसिकतायेचेर जातलो. ते खातीर 7 नोव्हेंबराक जावपी कार्यावळींत सगल्यांनी वांटो घेवन वंदे मातरम् गीत म्हणचे, असो उलो भाजप प्रदेशाध्यक्ष दामू नायक हांणी मारलो. ह्या वेळार मुख्यमंत्री डॉ. प्रमोद सावंत हांचे हस्तुकीं नाटकाचे दिग्दर्शक रवींद्र सातपुते हांचो भोवमान केलो. दत्ताराम चिमुलकार हांणी येवकार दिलो. प्रताप उगवेंकार हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
