भांगरभूंय | प्रतिनिधी
सत्तरीच्या शेतकारांची मागणी : शेतां, बागायतींचो इबाड
भांगरभूंय । प्रतिनिधी
वाळपय : फाटल्या एका म्हयन्या सावन गोंयांत एकसारको पावस पडटा. ताका लागून सरकारान ओलो दुकळ जाहीर करचो आनी लुकसाण पिडेस्त शेतकारांक लुकसाण भरपाय दिवपाची येवजण तयार करची, अशी मागणी शेतकार भावांनी केल्या.
एक म्हयन्या सावन एकसारको पडिल्ल्या पावसाक लागून शेती बागायतींचें व्हड प्रमाणांत लुकसाण जालां. व्हड प्रमाणांत सुपाऱ्यो झडपाक लागल्यात. सुपारी उत्पादन हें गोंयांतल्या शेतकारांक चड फायदो दिवपी पीक. सुपारी उत्पादकांक माडयांचेर वखद मारपाचो वेळ मेळूंक ना. हाचो परिणाम सुपारी झडपांत जालो. अंदूं 50 टक्क्यां परस अदीक उत्पादनाचेर परिणाम जालो, अशें शेतकारांचें म्हणणें आसा. सत्तरी म्हालांत व्हड प्रमाणांत सुपारी लागवड करतात. मात पावसान तांच्या उत्पादनाचेर उदक रकयलें. मजगतीं नव्या माडयांचेर लेगीत सेगीत पडिल्ल्या पावसाचो परिणाम जालो. उदक सांचून उरिल्ल्यान माडयो कुसल्यो. दोंगराळ वाठारांत सपाट जमनीर लायिल्ल्या काजीच्या झाडांचेर लेगीत पावसाचो परिणाम जालो. काजू उत्पादकांक हाका लागून लुकसाण जालां. मात विसव घेनासतना पडिल्ल्या पावसाक लागून नाल्ल लेगीत झडले. रानवटी जनावरांच्या उपद्रवाक लागून आदींच नाल्लांचें उत्पादन धोक्यांत आयलां. फाटल्या 10 वर्सांत नाल्लाचें उत्पादन खूब उणें जालां, अशें शेतकारांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
