भांगरभूंय | प्रतिनिधी
मुख्यमंत्री : तीन कुटुंबांक मेळ्ळो पक्को आलाशिरो
भांगरभूंय । प्रतिनिधी
दिवचल : भाजप हो फक्त राजकी पक्ष न्हय, जाल्यार मानवी जीण समृद्ध करचे खातीर आनी दरेका घरांत समृद्धी खातीर सेगीत वावर करपी एक समाजीक दुवो आसा. तेच भावनेन भाजप सांखळी मतदारसंघांतली मंडळ समिती आनी कार्यकर्त्यांच्या वांट्यान मतदारसंघांतल्या तीन कुटुंबांक पक्के घर बांदून आलाशिरो दिवपाची संद मेळ्ळ्या. हें व्हड समाधान. ‘म्हजें घर’ येवजण खऱ्या अर्थान कल्याणकारी थारतली. खूबश्यो येवजण्यो आंखून सामान्य लोकांक आनी निमाण्या घटका मेरेन सुविधा पावोवर ही आमची लागणूक आशिल्ल्याचें मुख्यमंत्री डॉ. प्रमोद सावंत हांणी सांगलें.
पोरूं पावसांत सांखळी तशेंच हरवळे ह्या वाठारांतल्या तीन घरांचें खूब लुकसाण जाल्लें. ताका लागून तांचो आलाशिरो शेणिल्लो. भाजपाच्या सांखळी मतदारसंघांतली मंडळ समिती आनी कार्यकर्त्यांच्या पुडाकारान हीं तिनूय घरां बांदून चवथी आदीं तांचें लोकार्पण करपाची संद मेळ्ळी हें आपलें भाग्य, अशें मुख्यमंत्र्यान तिनूय घरांच्या घरप्रवेशा वेळार उलयतना सांगलें.
ह्या वेळार मंडळ अध्यक्ष रामा नायक सरपंच गौरवी नायक साईमा गावडे, सिद्धी प्रभू, आनंद काणेकार, दयानंद बोर्येकार, सुभाष फोंडेंकार, हेर पंच, नगरसेवक आनी भाजप मंडळाचे पदाधिकारी उपस्थीत आशिल्ले.
सरकारान ‘म्हजें घर’ ही येवजण आंखीन दरेका कुटुंबाक थाकाय दिवपाचें काम केलां. ताका लागून ताण-तणाव उणो जातलो, तशेंच तांच्या भलायकेचेर बरो परिणाम दिसतलो. 1972 त आदलीं घरां कायम करतना तांकां पुराय मालकी हक्क दिवपाचें भाग्य आपल्याक मेळ्ळें. प्रधानमंत्री नरेंद्र मोदी हांच्या फुडारपणा खाला आमचो भारत देश गिरेस्तकायेचे तेंगशेर पावलां मारतां. गोंयांतल्या दरेका घरांत समृद्दी आनी निमाण्या घटका मेरेन उदरगतीचीं दारां उक्तीं करप हें सपन पुराय करचे नदरेन आमी व्हड प्रमाणार येसस्वी जातात, हाचें खूब समाधान आसा, अशें मुख्यमंत्र्यान सांगलें.
गरजेवंतांक आलाशिरो दिवचे खातीर सगल्यांच्या आदारान मुख्यमंत्र्यान उबारिल्लें पावल खऱ्या अर्थान फायद्याचें आसा. ताका लगून दरेका घरांत समृद्धी हाडपाचो मुख्यमंत्र्यांचो निश्चेव येसस्वी जातना दिसता, अशें गौरवी नायक आनी रामा नायक हांणी सांगलें. रामा नायक हांणी येवकार दिलो आनी भाजप, मुख्यमंत्री तशेंच कार्यकर्त्यांनी केल्ले मजती खातीर तांचे उपकार मानले. तुनूय कुटुंबियांनी मुख्यमंत्र्यांचे खास उपकार मानले.
‘निर्णय, विधेयकां गोंयच्या हिताचीं’
चवथ खऱ्या अर्थान गोंयकारांक तणावमुक्त आनी बरी भलायकी तशेंच उमेदीन मनोवपाक मेळची हे खातीर फाटल्या कांय म्हयन्यांत गोंय सरकारान कांय निर्णय घेतल्यात तशेंच विधेयकां संमत केल्यांत, तीं खऱ्या अर्थान कल्याणकारी राज्याचे दिशेन पावलां मारपी थारतलीं, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
