भांगरभूंय | प्रतिनिधी
सरपंच जोजफ सिक्वेरा : कळंगूटचे विशेश ग्रामसभेंत म्हायती
भांगरभूंय । प्रतिनिधी
म्हापशें : कळंगूट पंचायतीचो कारभार हो पंचायत राज कायद्या प्रमाणूच चलता. कसलोय निर्णय घेवचो पडल्यार कायदेशीर सल्लो घेतात. सध्यातरी घरपटी करांत वाड करपाचो पंचायतीचो कसलोच निर्णय जावंक ना, अशी म्हायती सरपंच जोजफ सिक्वेरा हांणी लोकांक दिली.
आयतारा 17 ऑगस्टाक सकाळीं कळंगूट पंचायतीची विशेश ग्रामसभा सरपंच सिक्वेरा हांचे अध्यक्षते खाला जाली. सरकारान घरपटी कराच्या सुदारीत दराचे अधिसुचोवणेचेर चर्चा करचे खातीर पंचायतीन ही ग्रामसभा आयोजीत केल्ली.
घरपटा कर वाडोवचो न्हय, अशी ग्रामसभेंत लोकांनी मागणी केली. सध्याचो घरपटीचो दरूच चालू दवरचो. फक्त गांवा भायल्या लोकांचे मालकीचीं हॉटेलां आनी हेर आस्थापनां खातीरचो कर वाडोवचो, अशी सुचोवणी लोकांनी ह्या वेळार केली.
पंचायत सध्या लोकां खातीर घरपटी कर वाडोवची ना, हाचो भरवसो दितना सरपंच सिक्वेरा हांणी सांगलें, जरी फेब्रुवारी 2022 त करवाडीची अधिसुचोवणी जारी केल्ली तरीय पंचायतीन घरपटी वाडोवंक ना.
पंचायतीन 1994 त घरपटी कर सुदारीत केल्लो. दर चौ.मि. प्रमाण नवो दर लागू करपाचो जालो जाल्यार इमारतीचो आराखडो नाशिल्ल्यान घराच्या आकाराची पडटाळणी करप हें कठीण काम आसतलें. तशेंच कर रकम निश्चीत करचे कातीर सगल्या संरचनांचें भौतीक मोजमाप करप लेगीत कठीण जातलें. आमी सगल्यो गजाली मोजमाप करचे खातीर टेप वापरपाक शकनात, अशें तांणी सांगलें.
जे 25 रुपया घरपटी भरताले, ते तितलेच पयशे दिवपाक शकतात. जर तांणी बिराडाक दिवचे खातीर चड कुडी बांदल्यात जाल्यार तांकां दर चौ.मि. खातीर 60 रुपया कर दिवचो पडटलो. तशेंच वेवसायीक आस्थापनां खातीर जर तुमी 150 रुपया कर भरतात जाल्यार आमी ताचे वयर एक रुपया लेगीत घेवचे नात, अशें सरपंचान स्पश्ट केलें. ग्रामसभेंत लोकांनी सुचयल्ल्या विवीध सुचोवण्यांचेर पंचायत मंडळाचे बसकेंत विचार करतले, अशें तांणी सांगलें. आमदार मायकल लोबो हांणी घरपटी दरवाडीचे अधिसुचोवणेचेर पंचायतीक सुचोवण्यो करचे परस हो मुद्दो तांणी विधानसभेंत मांडपाक जाय आशिल्लो. तशेंच सरकाराक ही अधिसुचोवणी फाटीं घेवपाक लावपाक जाय आसली, अशें सिक्वेरा हांणी सांगलें.
आमदार लोकांचो करता घुस्पागोंदळ : परब
कळंगूटची समस्या सोडोवचे खातीर पंचायती वांगडा काम करपाची आमदार ह्या नात्यान मायकल लोबो हांची जापसालदारकी आसा. सरपंच आनी पंचायत मंडळा कडेन चर्चा करचे बदला थेट पत्रकारां कडेन संवाद सादून पंचायतीक दोश दिवन लोकां मदीं घुस्पागोंदळ निर्माण करपाचो हो प्रकार आसा. 2021 त ह्या वाडीव कर धोरणाचो मसुदो तयार जाल्लो. तेन्ना लोबो हे मंत्री आशिल्ले. त्या वेळार तांकां लोकांचो हुस्को आशिल्लो जाल्यार तांकां दुरुस्ती खातीर विधानसभेंत संद आशिल्ली, अशें आदली उपसरपंच गीता परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
