भांगरभूंय | प्रतिनिधी
ग्रामसभेंत मागणी : रस्त्यांचे स्थिती संबंदांतूय उक्तायली नाराजी
भांगरभूंय । प्रतिनिधी
मडगांव : बेताळभाटी पंचायतींत सध्या कामय स्वरुपी सचीव नाशिल्ल्यान लोकांचीं कामां जायनात. ते खातीर गोंय सरकारान हाची दखल घेवन कायम स्वरुपी सचिवाची नेमणूक करची. तशेंच रस्त्यांची स्थिती बाबत जाल्या. तांचे दुरुस्ती कडेन लक्ष दिवचें, अशी मागणी थळाव्या लोकांनी ग्रामसभेंत केली.
बेताळभाटीची ग्रामसभा आयतारा सकाळीं पंचायतीचे कुशीक आशिल्ल्या सभाघरांत जाली. ह्या वेळार सरपंच मिनू फर्नांडीस गैरहाजीर राविल्ले. ताका लागून उपसरपंच इल्मा डायस हांचे अध्यक्षते खाला ही ग्रामसभा जाली. ग्रामसभेंत पंचायतींत कामा निमतान आयल्यार सचीव मेळना. ताका लागून कामां जायनात, अशी कागाळ थळाव्या लोकांनी केली.
पंचायतींतल्या सचिवाची बदली केले उपरांत दुसऱ्या सचिवा कडेन तात्पुरतो ताबो दिलो. ताचे कडेन दोन पंचायती आशिल्ल्यान तीन दीस बेताळभाटी सचीव येता. ताका योग्य तरेन निर्णय घेवपाक मेळना तशेंच उदरगतीचीं कामां फुडें व्हरपाक मेळना. हाजीर आशिल्ल्या लोकांनी लेगीत पंचायत संचालनालय आनी सरकारान हे समस्ये कडेन लक्ष दिवन कायम स्वरुपी सचिवाची नेमणूक करची, अशी मागणी केली. तशेंच गांवांत भुंयगत वीज केबल घालपाचीं कामां केल्यांत. त्या वेळार मान्सून येवचे आदीं रस्त्यांची दुरुस्ती करतले तशेंच ताचेर हॉटमिक्सींग करपाचें आस्वासन दिल्लें. ह्या आस्वासना कडेन आडनदर केल्या. लोबरां घालून तात्पुरतीं फोंडकुलां पुरयल्यांत. ताका लागून गांवांतले रस्ते गाडयो चलोवपाचे लायकीचे नात. पंचायतीन हे रस्ते दुरुस्त करचे, अशी मागणी लोकांनी केली. हाचेर जाप दितना डायस हांणी सांगलें, रस्त्यांची दुरुस्ती करपाक पंचायती कडेन फावोशे पयशे नात आनी तो उपलब्ध जायना. ह्या रस्त्यांची दुरुस्ती करची हे खातीर आमदारा कडेन मागणी केल्ली. पूण तांणी फक्त दोनूच प्रभागांतले कांय रस्ते दुरुस्त केले, पूण उरिल्ल्या रस्त्यांचेर फोंडकुलां आशिल्ल्याचें तांणी सांगलें. अपघाता सारकी दुर्घटणां घडचे आदीं रस्त्या वयलीं फोंडकुलां पुरोवची अशी मागणी लोकांनी केली.
गांवांत वाडपी बिगर गोंयकारांक लागून हुस्को
गांवांतली बिगर गोंयकारांची वाडटी संख्या हाचेर लेगीत लोकांनी हुस्को उक्तायलो. पुलीस बिराडकारांची पडटाळणी करतात, पूण तांची पंचायती कडेन कसलीच नोंद ना. बायलो, भुरगीं, जाण्टीं हांचे सुरक्षेचो प्रस्न निर्माण जाला. हे खातीर पंचायतीन लेगीत मोहीम हातांत घेवन गांवांत रावपी बिगर गोंयकारांची वळख पटोवन तांची नोंद दवरची, अशी मागणी लोकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
