भांगरभूंय | प्रतिनिधी
वाळपय : सत्तरी म्हालांतल्या ठाणे पंचायत वाठारांतल्या सुर्ला गांवांत गोंय पर्यटन खात्या वतीन इको टुरिझम प्रकल्प बांदतले. सरकारान ताका मान्यताय दिल्या. ह्या प्रकल्पाचें काम बेगिनूच हातांत घेतले. पूण गोंयांतल्या कांय पर्यावरण मोगींनी ह्या प्रकल्पाक विरोध करून हे विशींची जनहीत याचिका न्यायालयांत दाखल केल्या. ताका लागून ह्या प्रकल्पाचो फुडार हुमकळ्ळा. मजगतीं, सुर्लाच्या लोकांनी ह्या प्रकल्पा संबंदांत विशेश ग्रामसभा घेवपाची मागणी केल्ली. ही ग्रामसभा आयतारा ठाणेच्या पंचायतीच्या मल्टीपर्पज कॉम्प्लेक्सांत घेतली. हे ग्रामसभेंत प्रकल्पाक सगल्यांनी मंजुरी दिली.
सरपंच निलेश परवार हांचे अध्यक्षते खाला घेतिल्ले ग्रामसभेक उपसरपंच सोनिया गांवकार, पंच सरिता गांवकार, अनुष्का गावकार, सुभाष गावडे, सुरेश आयकार, विनायक गांवस, तनया गांवकार, पंचायतीचे सचीव सर्वेश गांवकार हाजीर आशिल्ले.
सुर्लाच्या प्रकाश गांवकार हांणी सांगलें, हो प्रकल्प गांवाचे नदरेन म्हत्वाचो आसा. सुर्ला गांव उंचायेर आसा. गांवांत उदरगतीच्यो कसल्योच सुविधा नात. हो प्रकल्प गांवांत आयलो जाल्यार उदरगतीची संद मेळटली. हो प्रकल्प पर्यावरणपुरक आसा. ह्या प्रकल्पाक विरोध करचे बदला तेंको दियात, अशी ताणें मागणी केली.
थारावा वटेन उलयतना श्रीकांत गांवकार हांणी सांगलें, गांवांत रोजगाराची कसलीच संद ना. हो प्रकल्प उबो जालो जाल्यार रोजगाराच्यो बऱ्यो संदी मेळूं येतात. थळाव्या परंपरीक संस्कृतीच्या माध्यमांतल्यान कलाकारांक माची मेळूं येता. सैमाचें आनी पर्यावरणाची राखण आमच्या पुर्वजांनी केल्या. सैम सांबाळपाची दरेकल्याची जापसालदारकी आसा. सैमाच्या निमतान गांवांतल्या पोटाचेर मारल्यार कशेंच सोंसून घेवचे नात, अशें तांणी सांगलें.
आदले पंच संतोष गांवकार हांणी सांगलें, म्हादय न्हंयेच्या अभयारण्य वाठारांत खूब प्रकल्प आसात. तांकां अजून मेरेन विरोध जावंक ना, जाल्यार सुर्ला येवपी प्रकल्पाकूच विरोध कित्याक? सुर्ला खूबशीं पर्यटन थळां आसात. ह्या प्रकल्पा वरवीं आपरोजगाराच्यो संदी निर्माण जातल्यो. उपसरपंच सोनिया गांवकार हांणी उपकार मानले.
प्रकल्प उदरगतीक गती दितलों : निलेश परवार
सैमाचें कसलेंच लुकसाण करिनासतना सरकार जर कोटींनी रुपया मोडून इको प्रकल्प सुरू करता जाल्यार ती बरी गजाल. ताका सगल्यांनीच तेंको दिवपाची गरज आसा. गोंय मुक्ती उपरांत एक बरो निर्णय गोंय सरकारान घेतला. अश्या प्रकल्पाक विरोध करचे परस तेंको दिलो जाल्यार गांवा सयत पुराय वाठाराचे उदरगतीक गती मेळटली, अशें सरपंच निलेश परवार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
