भांगरभूंय | प्रतिनिधी
गोविंद गावडे : रस्त्यांचे गुणवत्ते कडेन तडजोड करचे ना
भांगरभूंय । प्रतिनिधी
फोंडें : प्रियोळ मतदारसंघांतले दरेक रस्ते हे पूर्वनियोजीत अभ्यास आनी योग्य अशें नियोजन करुनूच बांदतले. हेच खातीर आठ वर्सां आदीं बांदिल्ले रस्ते जश्याक तश्शे आसात. रस्ते बांदतना पावसाचें उदक योग्य तरेन व्हांवून वतले, हाची आमी जतनाय घेतात. रस्त्याचीं कामां करतना रस्त्यांचे कुशीक आशिल्ल्या घर धनयांक विस्वासांत घेवनूच कामां करतात. हे मुखार लेगीत रस्त्यांचे गुणवत्ते विशीं कसलीच तडजोड करचे नात, अशी म्हायती प्रियोळचे आमदार गोविंद गावडे हांणी दिली.
सुमार पांच कोटी रुपया खर्च करून म्हाड्डोळ मशीद ते पिसगाळ मेरेनच्या रस्तो रुंदीकरण आनी उदरगतीच्या कामाक सुरवात करून दिवपाचे कार्यावळींत गावडे उलयताले. ह्या वेळार तांचे वांगडा वेलींगची सरपंच दीक्षा सतरकार, उपसरपंच रुपेश नायक, तिवरें वरगांवचे सरपंच जयेश नायक, वळवयचे सरपंच विनायक वेंगुर्लेकर हाजीर आशिल्ले. प्रियोळ मतदारसंघांत उदरगतीचीं कामा चालीक लायतना तीं शाश्वत कशीं उरतलीं हाचो आपूण विचार करता. निमाणे उदरगतीच्या कामां खातीर लोकांच्या बोल्सांतल्यानूच पयसो वता. एकदां केल्लें काम हें खूब वर्सां तिगपाक जाय. प्रियोळ मतदारसंघांत रस्त्यांचीं कामां करतना आपल्याक विस्वासांत घेवनूच रस्ते फोडचे वा हेर कामां करचीं, अशी सुचोवणी आपणे मुख्यमंत्री आनी वीज मंत्र्यांक केल्या. रस्त्यांच्या कामां संबंदांत मनमानी कारभार आपूण सोंसून घेवचों ना, अशें गावडे हांणी सांगलें.
‘मंत्री ना म्हूण कामां आडावचीं नात’
मंत्री ना म्हूण प्रियोळ मतदारसंघांतलीं उदरगतीचीं कामां आडवचीं नात. एक आमदार म्हूण फाटपुरवण कशी करची हें आपल्याक खबर आसा. मंत्रीपद मेळ्ळें जाल्यारूच उदरगत जाता, ही संकल्पना चुकीची आसा. आमी लोकांच्या हिता खातीर काम करतात. दरेका मनशाक कितें जाय हाचो विचार करून आपूण काम करीत रावतलो. प्रियोळ मतदारसंघांतल्या उदरगतीच्या कामांक मुख्यमंत्री आनी सरकाराच्या घटकांचो सदांच तेंको मेळटलो, अशें गोविंद गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
