भांगरभूंय | प्रतिनिधी
म्हादय प्रस्ना सयत हेर विशयांचेर सरकाराक कातरेंत धरपाची शक्यताय
भांगरभूंय । प्रतिनिधी
पणजी : विधानसभेच्या पावसाळी अधिवेशना खातीर काँग्रेस, आप सयत हेर विरोधी पक्षांची रणनिती फाल्यां मंगळारा थारतली. विरोधी पक्ष फुडारी युरी आलेमांव हांणी विरोधी आमदारांची फाल्यां मंगळारा बसका आपयल्या. अधिवेशनांत वेळ उणो मेळपाच्या कारणाक लागून विरोधी आमदारांनी कामकाज सल्लागार बसके वेळार सभात्याग केल्लो.
विरोधी पक्ष फुडारी युरी आलेमांव हांणी हाचे पयलीं बसका आपोपाक जाय आसली. सगळी प्रक्रिया जाले उपरांत बसका आपोवन कसलोच लाव ना. बसकेक वचपाचें काय ना, हे विशीं हांवें कांयच थारावंक ना, अशें गोवा फॉरवर्डाचे आमदार विजय सरदेसाय हांणी सांगलें.
गोंय विधानसभेचें पावसाळी अधिवेशन 21 जुलय ते 8 ऑगस्ट मेरेन चलतलें. 15 दीस चलपी ह्या अधिवेशनांत प्रस्नजापे सयत अर्थसंकल्पी चर्चा तशेंच खात्यांच्या मागण्यांचेर चर्चा जातली. खासगी कामकाजाचे तीन दीस आसतले.
काँग्रेसीचे 3, आपाचे 2, गोवा फॉरवर्ड आनी आरजीचो दरेकी 1 अशें 7 विरोधी आमदार आसात. मंत्र्यां सयत सत्ताधारी गटाचे 32 आमदार आसात. इबाडिल्ली कायदो सुवेवस्था, वाडटी बेरोजगारी, अॅप अॅग्रिगेटर मार्गदर्शक तत्वां, म्हादयचो प्रस्न अश्या विवीध प्रस्नांचेर विरोधी आमदार सरकाराची कोंयडी करतले, अशी आस्त आसा. अधिवेशनांत विरोधकां परस चडशे प्रस्न सत्ताधाऱ्यांचे आसात. लॉट पद्दतीन प्रस्न चर्चेक घेवपाक विरोधी आमदारांनी विरोध केल्लो. सत्ताधाऱ्यांचो एक प्रस्न आनी विरोधकांचो एक प्रस्न अशें पद्दतीन प्रस्न चर्चेक घेवपाची मागणी विरोधी आमदारांनी केल्ली. ही मागणी कामकाज सल्लागार समितीचे बसकेंत भायर मारली. दर दिसा विरोधी आमदारांच्यो दोन लक्षवेधी सुचोवण्यो घेवपाची मागणी आशिल्ली. ही मागणी लेगीत न्हयकारली. अधिवेशनांत चर्चे खातीर लेगीत चड वेळ दिवपाची मागणी विरोधी आमदारांनी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
