आयआयटीक गोंयांत बेगिनूच सासणाचो कॅम्पस

भांगरभूंय | प्रतिनिधी

मुख्यमंत्री : 2037 मेरेन विकसीत गोंय साकार करपाचो निश्चेव

भांगरभूंय । प्रतिनिधी

फोंडें : आयआयटी संस्थेन गोंयांत येत सावन गोंय सरकारा कडेन एक आगळें नातें निर्माण केलां. गोंय सरकाराचीं ध्येय धोरणां फुडें व्हरचे खातीर हांगाचो दरेक विद्यार्थी खर यत्न करता. देशा वांगडाच गोंय लेगीत म्हायती आनी तंत्रज्ञान मळार फुडें रावचे खातीर तुमचें योगदान आसा. तुमकां सगळ्यो सोयी सुविधा आशिल्लो कॅम्पस मेळपाक जाय, ह्या मताचे आमी लेगीत आसात. येता त्या काळांत जमनी संबंदांत जे कितें सोपस्कार आसतले ते पुराय करतले आनी कांय दिसांनीच आयआयटीक गोंयांत सासणाचो कॅम्पस दितले, अशें मुख्यमंत्री डॉ. प्रमोद सावंत हांणी सांगलें.

आयआयटी गोंय संस्थेचो सवो दिक्षांत सुवाळो फोंडेंच्या राजीव गांधी कला मंदिरांत जालो. ह्या सुवाळ्यांत मुख्यमंत्री मुखेल सोयरे म्हूण उलयताले. तांचे वांगडा आयआयटी गोंय संचालक मंडळाचे अध्यक्ष आदील जैनुलभाई, संचालक प्रोफेसर धिरेंद्र कट्टी हाजीर आशिल्ले.

विकसीत भारताचें सपन प्रधानमंत्री नरेंद्र मोदी हांणी पळयलां. 2047 त देश कसो आसतलो हाचे कांय आराखडे तांणी बांदल्यात. तांचें सपन पुराय करचे खातीर आयआयटीचे स्नातक निश्चीत सांगात दितले. म्हायती तंत्रज्ञान मळा वयल्या तज्ञांच्या आदारान 2037 मेरेन विकसीत गोंय आमी साकार करतले. उदरगतीचे बाबतींत एक शाश्वत परिमाण आमी लेगीत देशा मुखार उबे करतले. हे प्रक्रियेंत तुमकां वांटेकार करून घेतना आमकां खोस भोगतली, अशें मुख्यमंत्र्यान सांगलें.

आयज आयटीच्या माध्यमांतल्यान संशोधन मळार लेगीत बरो वावर जाता. व्हड संख्येन आयज आयटी विद्यार्थी ल्हान पिरायेंतूच पीएसडी सारक्यो पदवी घेवपाक लागल्यात. आयआयटी गोंयच्या प्राध्यापकांनी लेलगीत तांच्या वावरांतल्यान आनी शिक्षण शैलींतल्यान अख्ख्या संवसारांत स्वताचें नांव केलां. तेच वांगडा गोंयाक लेगीत प्रतिभा संपन्न केलां. राष्ट्रीय मळार आयज गोंयचें नांव जाता. तातूंत आयटीच्या प्राध्यापकां वांगडाच कांय फिशाल विद्यार्थ्यांचें लेगीत योगदान आसा.

आयज पदवी मेळटाच गोंयांतल्या आयआयटी विद्यार्थ्यांक व्हड नोकऱ्यो फुड्यांत येतात, ही सगल्याच खातीर खोशयेची गजाल. आयआयटीच्या विद्यार्थ्यांनी नोकऱ्यो सोदप्यांचे भुमिकेंत चड काळ रावचे न्हय. नोकऱ्यो निर्माण करपाचो यत्न करात. सरकारान तुमचे खातीर खूबस्यो येवजण्यो निर्माण करून दवरल्यात. घडये तुमच्या माध्यमांतल्यान उद्देग मळा वयली एक व्हड व्यक्ती गोंयांतल्यान निर्माण जाली जाल्यार गोंयाक ताचो अभिमानूच दिसतलो. गोंयांतल्यान पदवी घेवन गेले उपरांत विद्यार्थ्यांनी गोंयचें नातें केन्नाच विसरचें न्हय. दर वर्सा आदल्या विद्यार्थी मेळाव्याच्या निमतान येत रावात, तुमच्या माध्यमांतल्यान हांगाच्या पर्यटनाक घटसाण दियात, अशें मुख्यमंत्री डॉ. सावंत हांणी सांगलें.

आदील जैनुलभाई हांणी सांगलें, संवसाराचे उदरगतींत आयआयटीचें योगदान म्हत्वाचें आसा. आमच्या विद्यार्थ्यांनी स्टार्टअपच्या माध्यमांतल्यान समाजांत स्वताचो प्रभाव दाखयला. जे शिक्षणीक संस्थेंतल्यान तुमी खूब ज्ञान मेळयलां, फुडारांत संस्थे खातीर कितें तरी परतून दिवपाचो यत्न करात. 2047 चो विकसीत भारत घडोवपा खातीर तुमची भुमिका म्हत्वाची आसतली. घडये तें सपन तुमच्या माध्यामांतल्यानूच पुराय जातलें.

व्हर्च्युअल पद्दतीन केंद्रीय शिक्षण मंत्री धर्मेंद्र प्रधान हांणी ह्या वेळार आयआयटी पास जाल्ल्या विद्यार्थ्यांक खाशेलो संदेश दिलो. ह्या दिक्षांत सुवाळ्यांत वट्ट 15 विद्यार्थ्यांक पीएचडी, 13 विद्यार्थ्यांक एमटॅक, 145 विद्यार्थ्यांक बीटॅकच्यो पदव्यो भेटयल्यो.