भांगरभूंय | प्रतिनिधी
रस्त्याक लागून फेरीबोट सुरू जावपाक परतून कळाव
भांगरभूंय । प्रतिनिधी
पणजी : रायबंदर वटेनच्या रस्त्याचे काम पुराय जावंक नाशिल्ल्यान रो रो फेरी सोमारा सुरू जावंक पावली ना. चोडण – रायबंदर मार्गाचेर सोमार सावन (7 जुलय) रो रो फेरी सुरू करपाचो प्रस्ताव आशिल्लो. रो रो बोटीफेरीचे दर लेगीत अधिसुचीत जाल्ले. रो रो फेरीबोट सुरू जावपाक आनीक थोडे दीस लागतले, अशी म्हायती न्हंय येरादारी खात्याचे संचालक विक्रमराजे भोसले हांणी दिली.
रायबंदर – चोडण मार्गाचेर 6 फेरीबोटी येरादारी करतात. सकाळीं आनी सांजे फेरीबोटींत खुबूच गर्दी जाता. गर्दी उणी करपा खातीर ह्या मार्गाचेर रो रो फेरीबोटी सुरू करपाचो प्रस्ताव आसा. रो रो फेरीबोट हाडून ताची चांचणी लेगीत येसस्वी जाल्या. सोमार सावन रो रो फेरी सुरू करपा खातीर खात्यान तिकेटीचे दर लेगीत निश्चीत केल्ले. मात सोमार सावन रो रो फेरीबोट सुरू जाली ना. हाका लागून प्रवाशांक पयलीच्याच फेरीबोटींतल्यान येरादारी करची पडली.
रो रो फेरीबोटींत चड दुचाकी तशेंच चड गाडयो जातल्यो. रायबंदर वटेनच्या रस्त्याचें काम चालू आसा. हें काम पुराय जाले उपरांत रो रो फेरीबोट सुरू जातली, अशी म्हायती न्हंय येरादारी खात्याचे संचालक विक्रमराजे भोसले हांणी दिली. रो रो फेरीबोटींत 15 मोटारी रावतात. तशेंच प्रवाशांक बसपाक लेगीत बाकडे आसतात. रो रो फेरीबोट मार्चांत सुरू जावपाची आसली. फेरीबोट येवपाक उशीर जालो तशेंच दोनूय वटेन जेटीचें काम सुरू आसलें. हाका लागून मार्चांत रो रो फेरीबोट सुरू जाली ना. ही फेरीबोट सुरू जाले उपरांत चोडण, मयें, रायबंदर तशेंच दिवचलच्या लोकांक व्हड प्रमाणांत थाकाय मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
