भांगरभूंय | प्रतिनिधी
प्रकाश वेळीप : संघटणांचेर बंदी हें कारस्थान आशिल्ल्याचो आरोप
भांगरभूंय । प्रतिनिधी
मडगांव : राजकी आरक्षण, आदिवासी भवन आनी हेर मागण्यो मान्य करच्यो आनी ते उपरांतूच एसटी समाजा कडेन समाजीक नातें सांगचें, अशें एसटी समाजाचे फुडारी प्रकाश वेळीप हांणी सांगलें. तशेंच हे एके तरेचें कारस्थान आसा, असोय आरोप तांणी किलो.
उटा आनी गोमंतक गौड मराठा समाज ह्या संघटणांच्या पदाधिकाऱ्यांनी मडगांवां पत्रकार परिशद घेतिल्ली. ह्या वेळार वेळीप उलयताले.
ह्या संघटणांचेर बंदी घातिल्ल्यान ताचो परिणाम पुराय समाजाचेर जातलो. प्रेरणा दिसा निमतान आयोजीत कार्यावळी उपरांत गोविंद गावडे हांणी समाजाचे प्रस्न मांडले उपरांत तांचें मंत्रीपद काडून घेतलें. ते उपरांत आतां कितलेशेच म्हयने पडून आशिल्ल्या खटल्यांचेर 27 जून आनी 4 जुलय ह्या दिसा फक्त सप्तकभराच्या काळांत निकाल दिवन एसटी समाजा खातीर वावर करपी गोमंतक गौड मराठा समाज आनी उटा ह्या संघटणांचेर सरकारान बंदी हाडल्या. उटा ही फक्त गोविंद गावडे हांचे खातीर काम करपी संस्था न्हय जाल्यार ती एसटी समाजा खातीर वावर करपी आनी घटनेन दिल्ले हक्क मेळोवपा खातीर स्थापन केल्ली संस्था आसा, अशें वेळीप हांणी सांगलें.
कांय जाण एसटी समाजा कडेन समाजीक नातें आशिल्ल्याचें सांगतात. अशें आसा जाल्यार राजकी आरक्षणाचो मुद्दो, आदिवासी भवन आनी आदिवासी समाजाच्यो हेर 12 मागण्यो अजून पडून कित्याक आसात? येता त्या संसदेच्या अधिवेशनांत तें संमत करून घेवचें. एसटी समाजाक राजकी आरक्षण दिवचें आनी उपरांतूच समाजीक नातें सांगचें, अशें वेळीप हांणी सांगलें. गोमंतक गौड मराठा समाज संस्तेचेर बंदी हाडल्या. ताका लागून समाजाचीं प्रमाणपत्रां दिवपाचेर निर्बंध आयल्यात. संस्थेचो शिक्को, नांव वापरपाक मेळचें ना, सभा घेवपाक मेळची ना. समाजाचीं प्रमाणपत्रां दिवपाचो अधिकार प्रशासकाक वा सरकाराक लेगीत ना. हाचो परिणाम पुराय समाजाचेर जातलो, अशें गोमंतक गौड मराटा समाज संघटणेच्या विश्वास गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
