भांगरभूंय | प्रतिनिधी
विजय सरदेसाय : पेडणें म्हालांतल्या लोकांचे समजून घेतल्यो समस्या
भांगरभूंय । प्रतिनिधी
पेडणें : मांद्रें मतदारसंघांतले जे मुखेल प्रस्न आसात, ज्यो कांय मुखेल समस्या आसात, त्यो अजून मेरेन सुटाव्यो जावंक नात. ह्या मतदारसंघांतल्या लोकांनी वेंचून दिल्ल्या लोकप्रतिनिधीं लेगीत विधानसभेंत आवाज काडूंक ना. ताका लागून येता ते विधानसभा अधिवेशनांत मांद्रें मतदारसंघांतल्यो मुखेल समस्या, मुखेल प्रस्नां वांगडाच सीआरझॅड विशय, थळाव्या लोकांच्या घरांचेर आयिल्लें संकश्ट तशेंच तुयेंचे हॉस्पिटल सुरू करूंक ना हे विशय आपूण प्राधान्यान मांडटलों आनी सरकाराचें लक्ष ओडून घेतलों, अशी म्हायती गोवा फॉरवर्डाचे फुडारी तशेंच फातोड्डेंचे आमदार विजय सरदेसाय हांणी दिली.
पेडणें म्हालांतल्या लोकांचे प्रस्न, समस्या आयकून घेवचे खातीर मांद्रें जिल्हो पंचायत सभाघरांत बसका आपयल्ली. त्या वेळार विजय सरदेसाय उलयताले. तांचे वांगडा गोवा फॉरवर्डाचे सरचिटणीस दुर्गादास कामत, उत्तर गोंय अध्यक्ष दीपक कळंगूटकार, मांद्रेंचे आदले सरपंच प्रशांत बाळा नायक, प्रशांत घोडगे, धारगळचे आदले सरपंच तशेंच पंच अनिकेत साळगांवकार माचयेर हाजीर आशिल्ले.
पेडणें म्हालांतले दोनूय आमदार सरकारांत आसून लेगीत म्हालांतले मुखेल प्रस्न, समस्या सुटाव्यो जायनात. हे आदीं विरोधी पक्ष फुडारी तशेंच कुंकळ्ळीचे काँग्रेसीचे आमदार युरी आलेमांव हांणी लेगीत मांद्रें मतदारसंघांतल्या लोकांचे प्रस्न समजून घेवन हे प्रस्न विधानसभा अधिवेशनांत मांडपाचो यत्न करतलो, अशी हमी दिल्ली.
मांद्रें मतदारसंघांतल्या एमडीआर रस्त्याचे कुशीक जीं कांय घरां, दुकानां आसात तांचेर कारवाय जातली, अशी भिरांत लोकांनी बसकेंत उक्तायली आनी न्याय दिवपाची मागणी केली.
तुयें हॉस्पिटलाची इमारत बांदून सात वर्सां जालीं, तरीय हें हॉस्पिटल अजून कित्याक सुरू जायना, असो प्रस्न लोकांनी उपस्थीत केलो. ताचेर सरदेसाय हांणी सांगलें, येता त्या अधिवेशनांत सरकारा वांगडाच भलायकी मंत्र्याचेंय लक्ष ओडून घेवन हो प्रस्न सोडयतलों, अशें सरदेसाय हांणी सांगलें. दीपक कळंगूटकार हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
