भांगरभूंय | प्रतिनिधी
11 बायलांनी वॅस्ट इंडिजाच्या नामनेच्या क्रिकेट खेळगड्याचेर लैंगीक अत्याचार केल्ल्याचो आरोप केल्ल्यान खवदळ पडला. ह्या 11 जाणांक एक अल्पवयीन चली आसा. हे घडणुकेचेर क्रिकेट वॅस्ट इंडिजान (सीडब्ल्यूआय) टिप्पणी करपाक न्हयकार दिल्ल्यान दुबाव वाडलां.
वॅस्ट इंडिजांतल्या कांय प्रसार माध्यमांनी दिल्ले म्हायती प्रमाण वॅस्ट इंडिजांतल्या एका नामनेच्या क्रिकेट खेळगड्याचेर लैंगीक अत्याचार आनी बलात्काराचो आरोप आसा. हो खेळगडो गयानाचो आसा आनी सद्या राष्ट्रीय पंगडाचो वांटो आसा अशें एका टीव्हीच्या व्हिडियो अहवालांत म्हणलां. उण्यांत उणे 11 बायलांनी ह्या खेळगड्याचेर आरोप केल्ल्याचोय उल्लेख व्हिडियो अहवालांत आसा. पूण, ह्या खेळगड्या आड अजून मेरेन कसलोच आरोप दाखल जावंक ना. क्रिकेट वॅस्ट इंडिजान लेगीत हे विशीं भासाभास करपाक न्हयकार दिला, अशें सांगतात.
दोशी थारल्यार सध्या बार्बाडोसांतल्या केंसिंग्टन ओव्हलांत ऑस्ट्रेलिये आड पयली टॅस्ट मॅच खेळपी वॅस्ट इंडीज पंगडाचे प्रतिश्ठेचेर ताचो व्हड परिणाम जावंक शकता.
ह्या क्रिकेट खेळगड्याचेर हो आरोप सुरवेक गयानाच्या बर्बिसाचे एके बायलेन केल्लो. ही घडणूक 3 मार्च 2023 दिसा बर्बिसांतल्या न्यू अॅम्स्टरडॅम हांगाच्या एका घरांत घडली, अशें ती सांगता.
दुबावीत क्रिकेटर पिडितेच्या कुटुंबाचो वळखीचो आशिल्लो आनी घडणुके वेळार 18 वर्सां पिरायेची आशिल्ले, अशें पिडेस्ताचे आवयन सांगलें.
मजगतीं, क्रिकेट वॅस्ट इंडिजाचे (सीडब्ल्यूआय) अध्यक्ष डॉ. किशोर शॅलो हांणी मंडळाक खंयच्याच विशिश्ट आरोपांची म्हायती नाशिल्ल्याचो उल्लेख केलो. ह्या विशयाचेर कसलीच टिप्पणी करीना. क्रिकेट वॅस्ट इंडिजाक परिस्थितीची म्हायती ना आनी ताका लागून ह्या खिणाक तो टिप्पणी करपाक शकना, अशें शॅलो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
