भांगरभूंय | प्रतिनिधी
दिवचल: गोंयचो परंपरी शिगमोत्सव हो खूबशा गजालींची जाण करून दिवपी आविश्कार आसा आनी तातूंत कला, संस्कृती आनी श्रद्धेचो संगम आसा. ह्या शिगमोत्सवांत गीत, ध्वनी, नृत्य, लोककला आसा. हो उत्सव सदांच सगल्यांक एकठांय हाडपाचो आनी आपापसातल्यो आदर भावना, एकवट घटमूट करपाचो संदेश दीत आसता. म्हणूनच ह्या उत्सवाक दरेकाच्या वैयक्तीक, समाजीक, राजकी, उद्देगीक जिणेंत लेगीत मोटे म्हत्व आसा अशें उलोवप नामनेचे युरोलॉजी तज्ञ आनी गांवठणचे पूत डॉ. मधुमोहन देसाय हांणी सांखळेंत केलें.
गोंय राज्य पर्यटन खातें, सांखळी नगरपालिका आनी सांखळी शिगमोत्सव समिती वतीन आयोजीत केल्ल्या सांखळी शिगमोत्सव 2024 चें उक्तावण दबाज्यान जालें.
ह्या वेळार माचयेर नामनेचे लोकवेद अभ्यासक झिलू गांवकार, शिगमोत्सव समितीचे अध्यक्ष आनी सांखळेचे मुख्याधिकारी कबीर शिरगांवकार, उपाध्यक्ष जयेश कळंगूटकार, सचीव धीरज नागवेंकार, भांडारी रजनिकांत मळीक हाजीर आशिल्ले.
ह्या शिगम्यांतले संस्कार हे जिणेंतल्या दरेक पैलुंचेर उपेगी पडटात. म्हणून ह्या शिगमोत्सवांतली श्रद्धा आनी अत्मियता सांबाळून दवरप फुडले पिळगे खातीर गरजेची आसा अशेंय डॉ. देसाय हांणी म्हणलें.
गोंयचो शिगमोत्सव आनी चवथ ह्या दोन परबांक व्हड म्हत्व आसा आनी फक्त ह्याच परबां खातीर आमचें पांय गांवां कडल्या घरा वटेन वळटात. ह्या शिगमोत्सवातली धर्मीक कार्यां आनी तीर्थ म्हणल्यार अमृत आसता. त्याच मोगा खातीर आमी ह्या शिगमोत्सवाचें पावित्र्य आनी मोग सांबाळीत आसता. शिगमोत्सव म्हणल्यार फक्त होळी असो समज आयज सगले कडेन पातळ्ळा. पूण गोंयच्या शिगमोत्सवाक होळयेक वेगळेंच म्हत्व आसा, आनी शिगमोत्सवांतली परंपरा, प्रथा, कला आनी संस्कृतीक वेगळेंच म्हत्व आस. ही शिगम्याची परंपरा आमच्या जाण्ट्यां लोकांनी सांबाळून आमचे कडेन दिल्या. ती त्याच म्हत्वान आमचे फुडले पिळगे मेरेन पावोवपाची जापसालदारकी आमची आसा अशें लोकवेद अभ्यासक झिलू गांवकार हांणी म्हणलें.
दिवली पेटोवन शिगमोत्सवाचें उक्तावण केलें. सांखळी नगरपालिकेचे मुख्याधिकारी तशेंच सांखळी शिगमोत्सवाचे अध्यक्ष कबीर शिरगांवकार हांणी येवकार आनी प्रास्तावीक केलें. संतोष भगत हांणी सोयऱ्यांची वळख करून दिली. हे कार्यावळींत डॉ. मधुमोहन देसाय आनी झिलू गांवकार हांचो भोवमान केलो. सुत्रसंचालन अनील वेर्णेंकार हांणी केलें. जाल्यार प्रिती जल्मी हांणी उपकार मानले.
ह्या उक्तावण कार्यावळी उपरांत ल्हान भुरग्यांची वेशभुशा सर्त घेतली. उपरांत हेरंब प्रस्तूत ‘गर्जतो मराठी’ ही संगिताची कार्यावळ जाली.
आयज बिरेस्तारा सांजवेळा 4 वरांचेर रवींद्र भवन सांखळे सावन चित्ररथ, रोमटामेळ, लोकनृत्य पंगड आनी उक्तो गट वेशभुशा सर्तीचे मिरवणुकेक सुरवात जातली. ह्या सुवाळ्याक जिल्होधिकारी स्नेहा गीते, पुलीस उपअधिक्षक विश्वेश कर्पे हे मानेस्त हाजीर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
