भांगरभूंय | प्रतिनिधी
भांगरभूंय । प्रतिनिधी
काणकोणः पैंगीण हांगच्या श्री परशुराम विद्यार्थी वसतीगृहाच्या वर्धापन दिसा सेगीत 32 वर्सा वसतीगृहाचे कार्यवाह म्हणून काम करपी काशिनाथ वझे हाचो भोवमान केलो. ह्या वेळार कार्यावळीचो अध्यक्ष साहित्यीक कमलाकर म्हाळशी, जिल्हो पंचायत वांगडी शोभना वेळीप, वसतीगृहाचो अध्यक्ष उदय प्रभुगांवकार माचयेर आशिल्ले.
वसतीगृहांतल्या विद्यार्थ्यांच्या सर्वांगी प्रगतीचें स्रय सेवाभावी वृत्तीत काम करपी सगल्यांक दिवपाक जाय. काशिनाथ वझे हांणी 32 वर्सा सेवाव्रत भावनेन वसतीगृहा कडेन पळयलें अशें पैंगीणची सरपंच सविता तवडकारान सांगलें.
विद्यार्थी, पालक आनी शिक्षक हाचे मदीं मेकळेपण आसपाक जाय. म्हजें वसतीगृह, म्हजी शाळा, म्हजे शिक्षक ही भावना तयार जावपाक जाय. तशें जाल्यारूच आमी आदर्श व्यक्ती जावपाक शकतात, श्रीराम, शिवाजी महाराज हांका आमी समजून घेवंन ते प्रमाण कृती करपाक जाय अशें कमलाकर म्हाळशी हाणे सांगून वसतीगृहा खातीर समर्पणाचे भावनेन वावुरपी सगल्यांक तांणे परबीं भेटयलीं.
शोभना वेळीप हिणे वसतीगृहाक मजत करपाची इत्सा उक्तावन हें वसतीगृह म्हणल्यार विद्या मंदीर आसा अशें सांगलें. मानेस्ताचे हस्तुकीं येसस्वी विद्यार्थ्यांक इनामां दिलीं. वसतीगृहाचो आदर्श विद्यार्थी म्हणून शुभम गुरू देविदास, गुणी विद्यार्थी म्हणून प्रणव खुशाली वेळीप, आनी खेळगडो म्हणून रुचिकेत नारायण गांवकार हाचो भोवमान केलो. कार्यावळीचें सूत्रसंचालन सुनील पैंगीणकारान केलें. पसायदानान कार्यावळीचो समारोप केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
