भांगरभूंय | प्रतिनिधी
नवी दिल्ली, खबरां संस्थाः नॅशनल टेस्टिंग एजन्सीन (NTA) भारत सरकाराचे मान्यतायेन नीट-यूजी परिक्षेची नवी तारीख जाहीर केल्या. आतां ही परिक्षा आयतारा 21 जून 2026 दिसा जातली. नीट परिक्षेचे पेपर लिक जाल्ल्या कारणान घेतिल्ली परीक्षाच रद्द केल्ली.
नीट पेपर लीक प्रकरणाचेर बिरेस्तारा केंद्रीय शिक्षण मंत्री धर्मेंद्र प्रधान हांच्या हांणी उच्च पांवड्यावेली बसका घेतली. NEET-UG 2026 परिक्षा रद्द जाले उपरांत दोन दिसांनी ही बसका जाली. हे बसकेंत नीट परीक्षा परतून घेवपाचेर चर्चा जाली.
हे बसकेंत उच्च शिक्षण सचीव विनीत जोशी, शाळा शिक्षण सचीव संजय कुमार, नॅशनल टेस्टिंग एजन्सीचे महासंचालक अभिषेक सिंग, सीबीएसईचे अध्यक्ष राहुल सिंग, केंद्रीय विद्यालय संघटन आनी नवोदय विद्यालय समितीचे आयुक्त आनी हेर अधिकारी हाजीर आशिल्ले.
मजगतीं, सीबीयान आतां मेरेन ह्या प्रकरणांत 7 जाणांक अटक केल्या. दिल्लींतल्या रावज एव्हेन्यू कोर्टान 5 आरोपींक 7 दिसांची कोठडी दिल्या. राजस्थानांतल्या सीकर वाठारांतल्यान मांगीलाल बिंवाल आनी जमवारामगड वाठारांतल्यान दिनेश बिंवाल, तांचो पूत विकास बिंवाल, हरयाणांतल्या गुरुग्राम वाठारांत रावपी यश यादव, नाशिकच्यान शुभम खैरनार आनी महाराष्ट्रांतल्यान धनंजय लोखंडे आनी मनीषा वाघमारे ह्या दुबावितांक आतां मेरेन अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
