भांगरभूंय | प्रतिनिधी
तीन म्हयन्यांत 77 दुयेंती; स्थलांतरीत कामगारांचें चड प्रमाण
भांगरभूंय । प्रतिनिधी
पणजीः जानेवारी ते मार्च 2023 मजगतीं डेंग्यूचे 24 दुयेंती सांपडिल्ले. जाल्यार 2024 त ह्याच तीन म्हयन्यांत डेंग्यूचे 77 दुयेंती मेळ्ळ्यात. तातूंतलीं चडशीं प्रकरणां स्थलांतरीत कामगारांचे वस्तींत सांठोवन दवरिल्ल्या उदकांतल्या जळारांचे पैदासीन जाल्यात. अशें आसलें तरीय भलायकी खात्यान केल्ल्या विवीध उपाय येवजण्यांक लागून एप्लीर म्हयन्यांत डेंग्यूच्या दुयेंतींचो आंकडो उणो जातलो, असो विस्वास भलायकी अधिकारी आनी राष्ट्रीय वेक्टर बोर्न दुयेंस नियंत्रण कार्यावळीची उपसंचालिका डॉ. कल्पना महात्मे हांणी उक्तायला.
गोंयांत अंदूं जानेवारी ते मार्च म्हयन्यांत वास्को, मयें, सांखळी, दिवचल, म्हापशें, खोर्ली, कांदोळी, शिवोली, साळगांव, कोलवाळ, पेडणें, कुडचडें वाठारांत डेंग्यूचे दुयेंती सांपडल्यात. चड करून गिमांत डेंग्यूचे दुयेंती चड मेळनात. अंदूं भोवतेक प्रकरणां स्थलांतरीत कामगार वस्ती वा बांदकाम कामगारांचे वस्तींत सांपडल्यांत. उदकाचो उणाव आशिल्ल्यान अश्या सुवातांचेर उदक साठोवन दवरतात. ह्या उदकांत जळारांची पैदास जावन तीं चाबिल्ल्यान डेंग्यूचे दुयेंती वाडटात, अशें डॉ. महात्मे हांणी सांगलें. ह्या तीन म्हयन्यांत थळाव्यांक डेंग्यूची लागण जावपाचें प्रमाण सामकें उणें आसा. दरेकल्यान आपल्या घरांत झाडांचे वाज, फ्रीज, एसी वा हेर कडेन उदक सांचून उरचें ना, हाची जतनाय घेवपाक जाय. दर सात दिसांनी अशें सांचिल्लें उदक काडून उडोवपाक जाय. घरा भोंवतणी, कुळागरांत लेगीत उदक सांचून उरचें ना, हाची जतनाय घेवपाक जाय. वेळावेळार घरांतली नितळसाण केल्यार थळाव्यांक जावपी डेंग्यूचें प्रमाण 80 ते 90 टक्क्यांनी उणें जावपाची शक्यताय आसा, अशें डॉ. महात्मे हांणी सांगलें.
नोडल अधिकारी नेमतले
भलायकी खात्यान हेर सगळीं सरकारी खातीं तशेंच शाळांक नोडल अधिकाऱ्याची नेमणूक करपाक सांगलां. हे नोडल अधिकारी खात्याच्या कार्यालयांत, शाळेच्या वाठारांत उदक सांचून डेंग्यूच्या जळारांची पैदास जावची ना, हाची जतनाय घेतले.
डेंग्यू आडावपाक विवीध उपक्रम
डेंग्यूची लागण उणी करचे खातीर खात्या वतीन विवीध यत्न करतात. डेंग्यूचे जागृताये खातीर कार्यशाळा, सर्ती घेतात. तशेंच पंचायत आनी पालिका कर्मचाऱ्यांचे मजतीन कोयर एकठाय करप आनी उखलप, बांयांनी गप्पी नुस्तें सोडप, पोरणें टायर एकठांय करप, अशे उपक्रम चालीक लायतात, अशें डॉ. कल्पना महात्मे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
