भांगरभूंय | प्रतिनिधी
– केंद्रीय अहवालांतली म्हायतीपणजीः हेर राज्यांचे तुळेंत गोंयांत वैजकी उपचाराचो खर्च सगल्यांत उणो आसा. गोंयच्या शारांनी आनी गांवगिऱ्या वाठारांनी दर हॉस्पिटलांत दाखल जावपा खातीर जावपी सरासरी वैजकी खर्च राश्ट्रीय सरासरीच्या अर्दा परस उणो आसा. ही म्हायती केंद्रीय सांख्यिकी आनी प्रकल्प अंमलबजावणी खात्याच्या राष्ट्रीय नमुनो सर्वेक्षण कार्यालयान (एनएसएसओ) केल्ल्या सर्वेक्षण अहवालांतल्यान मेळयल्या. हें सर्वेक्षण जुलय 2022 ते जून 2023 ह्या काळांत केल्लें.
एनएसएसओन गोंयांतल्या 639 गांवगिऱ्या आनी 314 शारांतल्या कुटुंबांतल्या 3,645 व्यक्तींचें सर्वेक्षण केले. ते प्रमाण वयल्या काळांत गोंयच्या गांवगिऱ्या हॉस्पिटलांत दाखल जाल्ल्या व्यक्तीन सरासरी 274 रुपया खर्च केला. राष्ट्रीय सरासरी 1,035 रुपया आशिल्ली. गोंयांतल्या एका कुटुंबाक 1,097 रुपया खर्च जालो. जाल्यार एका कुटुंबाची राष्ट्रीय सरासरी 4,496 रुपया आशिल्ली.
मेघालय (393 रुपया), छत्तीसगड (532 रुपया) ह्या राज्यांनीय दर मनशाक आनी कुटुंबीक खर्च उणो आशिल्लो.
वयल्या काळांत गोंयच्या शारी वाठारांतल्या हॉस्पिटलांत दाखल जाल्ल्या मनशाक सररारी 625 रुपया खर्च जाले. हाची राश्ट्रीय सरासरी 1,879 रुपया आशिल्ली. गोंयांतल्या एका कुटुंबाक सरासरी 20,253 रुपया खर्च जालो. जाल्यार एका कुटुंबाची राष्ट्रीय सरासरी 6,877 रुपया आशिल्ली. नागालँड (740 रुपया) आनी अरुणाचल प्रदेश (766 रुपया) ह्या शारांनीय दर मनशाचो सरासरी खर्च उणो आशिल्लो. संघराज्य लड्डाखांत गांवगिऱ्या वाठारांनी 85 रुपया आनी शारांनी 138 रुपया खर्च जालो.
——————–
राज्यांतले हेर खर्चूय उणे
अहवाला प्रमाण हॉस्पिटलांत दाखल जावपाच्या वेळार भलायकी विम्याचो आस्पाव नाशिल्लो हेर खर्चूय राज्यांत उणो आसा. गोंयच्या शारांनी एका दुयेंतीक वर्साक सरासरी 488 रुपया फारीक करचे पडटाले. हाची राश्ट्रीय सरासरी 1,446 रुपया आशिल्ली. जाल्यार गांवगिऱ्या वाठारांतल्या एका दुयेंतीक 227 रुपया खर्च केलो. गांवगिऱ्या वाठारांनी राश्ट्रीय सरासरी वर्साक 950 रुपया आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
